अगस्ता वेस्टलैंड चॉपर घोटाला मामिलामे आरोपी ब्रिटिश नागरिक क्रिश्चियन मिशेलक याचिका एससी द्वारा खारिज

नई दिल्ली
*

सुप्रीम कोर्ट अगस्ता वेस्टलैंड चॉपर घोटाला मामिलामे सुनवाईक दौरान आरोपी ब्रिटिश नागरिक क्रिश्चियन मिशेल जेम्सक याचिका खारिज कए देलक। दरअसल, क्रिश्चियन मिशेल दिल्ली हाई कोर्टक आदेशक सुप्रीम कोर्टमे चुनौती देने छल। एही सुनवाईक दौरान सुप्रीम कोर्ट एहि मामिलामे राहत देबासँ स्पष्ट इनकार कएलक। क्रिश्चियन मिशेल अगस्ता वेस्टलैंड चॉपर घोटाला मामिलामे दिल्ली हाई कोर्ट द्वारा जमानतक शर्तक खिलाफ सुप्रीम कोर्टमे याचिका दाखिल कएने छल, जे खारिज कएल गेल।

जनतब जे दिल्ली हाई कोर्ट अगस्ता वेस्टलैंड चॉपर घोटाला मामिलामे क्रिश्चियन मिशेलकेँ जमानत पर रिहा करबाक आदेश देने छल संगहि कोर्ट शर्त रखने छल जे हुनका भारतमे अपन निवासक जानकारी देबय पड़त, जतय जमानत भेटलाक बाद ओ रहताह।

तकर बाद हाई कोर्टक जमानत शर्तक खिलाफ क्रिश्चियन मिशेल सुप्रीम कोर्टमे याचिका दायर कयने रहथि आ एहि जमानतक शर्त सभमे संशोधनक मांग कयने रहथि, जेकरा सुप्रीम कोर्ट खारिज कय देलक।

क्रिश्चियन मिशेलक वकील सुप्रीम कोर्टक समने दलील देलक जे हाई कोर्ट द्वारा राखल जमानतक शर्तमे रिहाइक पूर्व एकटा स्थानीय पता देनाइ शामिल अछि। जा धरि ओ बाहर नहि आबि जाएत, ई शर्त पूरा नहि कयल जा सकैत अछि। मिशेलक पासपोर्ट एक्सपायर भऽ चुकल अछि आ ओ लोकल एड्रेस देबयमे असमर्थ छथि। एही पर सुप्रीम कोर्ट कहलक कि जँ ओ स्थानीय पता नहि दऽ सकैत छथि तऽ बेसी बढिया अछि जे ओ तिहाड़ जेलमे रहथि, की क’ सकैत छी ! हम अहाँकेँ जमानत दऽ देलहुँ अछि, मुदा अहाँ शर्त सेहो पूरा नहि करए चाहैत छी ? जँ अहाँक परिवार अहाँकेँ निर्देश दऽ सकैत अछि तऽ इहो कऽ सकैत अछि।

तकर बाद सुप्रीम कोर्ट क्रिश्चियन मिशेलक जमानतक शर्तसभमे संशोधनक मांगक ओहि याचिका पर विचार करबासँ साफ इनकार कऽ देलक।