बुधकेँ संसदक बाहर खूब हल्ला भेल। वास्तवमे लोकसभामे प्रतिपक्षक नेता आ कांग्रेस नेता राहुल गाँधी किसान नेतासभकेँ संसदमे अपन कार्यालयमे बैसार करबाक लेल बजौने छलाह। मुदा जखन किसानसभकेँ संसदक भीतर प्रवेश नहिं देल गेल तखन हंगामा भेल। मुदा, हंगामा आ विरोधक बाद किसान नेतासभक १२ सदस्यीय प्रतिनिधिमण्डल लोकसभाक नेता प्रतिपक्षसँ भेंट कयलक।
ओ कहलनि, “इ समस्या अछि। मुदा हमरा की करबाक चाही ? ई एकटा तकनीकी समस्या सेहो भए सकैत अछि। मुदा, किछु समयक बाद किसानसभकेँ भीतर जयबाक अनुमति देल गेल। एजेंसीक अनुसार किसानक प्रतिनिधिमंडल राहुल गांधीक समक्ष प्राइवेट मेंबर्स बिल (निजी सदस्य विधेयक) अनबाक बात रखलक अछि।
किसान मजदूर मोर्चा आ संयुक्त किसान मोर्चा (गैर-राजनीतिक) केर तत्वावधानमे देशभरिसँ १२ किसान नेताक एकटा प्रतिनिधिमण्डल राहुल गाँधीसँ भेंट कयलक। बैसारक दौरान कांग्रेस सांसद केसी वेणुगोपाल, अमरिंदर सिंह राजा वरिंग, सुखजिंदर सिंह रंधावा, गुरजीत सिंह औजला, धर्मवीर गांधी, डॉ. अमर सिंह, दीपेन्द्र सिंह हुड्डा आ जय प्रकाश सेहो उपस्थित छलाह।
किसान नेता सभसँ भेंट कयलाक बाद राहुल गांधी कहलनि, “हम अपन घोषणापत्रमे कानूनी गारंटीक संग एमएसपी केर उल्लेख कयने छी। हम एकटा आकलन कयलहुँ आ एकरा लागू कएल जा सकैत अछि। हमसभ एखने एकटा बैसार कयलौंह जाहिमे ई निर्णय लेल गेल जे हम विपक्षी गठबंधनक अन्य नेतासँ गप्प करब आ सरकार पर दबाव बनबैत देशक किसानसभकेँ एमएसपी केर कानूनी गारंटी दिआयब।”
२२ जुलाईकेँ संयुक्त किसान मोर्चा (गैर-राजनीतिक) आ किसान मजदूर मोर्चा कहलक जे ओ देश भरिमे मोदी सरकारक पुतला दहन करत। एमएसपी गारंटीकेँ वैध बनाबय, ऋण माफी, फसल बीमा, किसान आ खेतिहर मजदूरक लेल पेंशन, बिजलीक निजीकरण वापिस लेबाक माँगकेँ पूरा करबाक लेल नव विरोध प्रदर्शन शुरू करत।
एकर अतिरिक्त विपक्ष द्वारा निजी विधेयकक समर्थन करबा लेल मार्च सेहो निकालत।
प्रदर्शनकारी किसान १५ अगस्तकेँ देशभरिमे ट्रैक्टर रैली निकालत। आ नव आपराधिक बिलक प्रति सेहो जराओत।
किसान संगठनक कहब छलैक जे किसानक ‘दिल्ली चलो’ मार्च ३१ अगस्तकेँ २०० दिन पूरा करत। संगठनसभ किसानसभसँ पंजाब-हरियाणाक खनौरी-शंभू सीमा धरि पहुँचबाक अपील सेहो कयलक अछि।
