राष्ट्रीय जनता दलक नेता आ महागठबंधनक सीएम चेहरा तेजस्वी यादवकें सोशल मीडिया पर ट्रोल कएल जा रहल अछि। तेजस्वी यादव शनिदिन दुपहर डेढ़ बजे पत्रकार सम्मेलन कय हड़बड़ीमे मीडियाकें बतेने छलाह जे मतदाताक विशेष सघन संशोधनक दौरान चुनाव आयोग हुनक नाम सेहो मतदाता सूचीसॅं हटा देलक अछि। ओ पूछने छलाह जे आब हम चुनाव कोना लड़ि सकब। एकर किछू कालक बाद आम लोग भारतीय निर्वाचन आयोग केर वेबसाइट पर उपलब्ध जानकारीकें खोजि तेजस्वी यादव केर मतदाता सूचीमे मौजूदगीक सबूतकें सोशल मीडिया पर वायरल कय देलक।
भाजपा सेहो एहि मुद्दाकें उठा लेलक। बिहारक उपमुख्यमंत्री सम्राट चौधरी तेजस्वी यादवक नाम मतदाता सूचीक तस्वीरक संग विधिवत शेयर कयलनि।
उपमुख्यमंत्री सम्राट चौधरी सोशल मीडिया पर एकटा तस्वीर पोस्ट कयलनि जाहिमे तेजस्वी यादवक नाम मतदाता सूचीमे देखाओल गेल अछि। एकर बाद ओ लिखलनि जे तेजस्वी जी, हमहीं नहि, अहाँक परिवार आ पूरा बिहारकेँ सेहो अहाँक क्षमता पर शंका अछि। एस.आई.आर ड्राफ्टमे अहांकेँ नाम तकनाय बहुत मुश्किल होएत। अहाँक नाम अहाँक पिताक संग सम्मानपूर्वक 416 नंबर पर पंजीकृत अछि, अहाँ देखि सकैत छी। आब भ्रामक आ धोखाधड़ीक धंधा बंद करू। राजदक भ्रम आ डर दुनू बेर बोगस साबित भऽ रहल अछि।
जनतब दी जे नेता प्रतिपक्ष तेजस्वी यादव शनिदिन चुनाव आयोग पर एकटा पैघ आरोप लगौलनि। ओ मतदाता सूची संशोधन पर सवाल उठेलनि आ दावा कयलनि जे हमर नाम मतदाता सूचीमे नहि अछि। हम चुनाव कोना लड़ब ? तेजस्वी चुनावी ऐप देखाबैत कहलनि जे, जखनि हुनकर ईपीआईसी नंबर सर्च होइत अछि तॅं हुनकर नाम मतदाता सूचीमे नहि आबि रहल अछि। मुदा चुनाव आयोग तत्काल तेजस्वीक दावाकें एकदमसॅं खारिज कय देलक। चुनाव आयोगक कहब अछि जे हुनक नाम मतदाता सूचीक प्रारूपमे अछि। आयोग मतदान केंद्रक सूची जारी कयलक अछि, जाहिमे तेजस्वीक नाम हुनकर फोटोक संग 416 नंबर पर मौजूद अछि। आयोग कहलक कि ई हमरा सबहक नजरिमे आएल अछि कि तेजस्वी यादव बेतुका दावा कयलनि कि हुनक नाम मतदाता सूचीक मसौदामे नहिं अछि। मतदाता सूची मसौदामे हुनक नाम 416 नंबर पर दर्ज अछि। एहि लेल राजद नेताक दावा झूठ आ तथ्यात्मक रूपसॅं गलत अछि।
