मजदूर दिवसक अवसर पर राष्ट्रीय मजदूर कांग्रेस इंटक द्वारा श्रम केन्द्र पंडित राजेन्द्र मिश्र कांग्रेस भवन, कचहरी ढालामे एकटा कार्यक्रम आयोजन कयल गेल। एहि कार्यक्रम केर संबोधित करैत मुख्य अतिथि केशर कुमार सिंह कहलनि कि वर्तमानमे मजदूरक सामने पैघ चुनौती अछि।रोजगार कम भऽ रहल अछि आ संसाधन खतम भऽ रहल अछि। श्रम कानून समाप्त कए श्रम संहिता विधेयक लागू कयल गेल जे मालिकक हितमे अछि। कार्यक्रम केर अध्यक्षता करैत इंटक अध्यक्ष सत्य नारायण चौपाल कहलनि कि शिकागोमे शहीद कार्यकर्ताक यादमे मई दिवस मनाओल जायत अछि। लाखों मजदूरक शहादतक बाद मजदूरक हितमे कानून बनाओल गेल। केन्द्र सरकार द्वारा श्रम विरोधी कानून रद्द कय देल गेल अछि आ चारि श्रम संहिता विधेयक आनल गेल अछि, एकर खिलाफ इंटक लड़ैत अछि आ भविष्यमे सेहो लड़ैत रहत। ज्ञान विज्ञान समितिक जिला अध्यक्ष हरिनारायण चौपाल सभामे कहलनि जे मजदूर लाचार नहि अपितु ओ बड्ड बलवान छथि। महिला जिला अध्यक्ष आशा देवी कहलनि जे महिला मजदूरक संग लैंगिक भेदभाव, समान काजक लेल समान मजदूरी नहिं भेटब, घरेलू हिंसा आ महिला मजदूरक बीच शारीरिक शोषण सबसँ पैघ चुनौती अछि, जाहिमे व्यापक सुधारक आवश्यकता अछि। एहि कार्यक्रम केर मजनु हैदर, ललिता देवी, हरे कृष्ण कुमार, प्रमिल कुमार, सुधीर शर्मा, फुलो देवी, पिंकी देवी, सानी देवी, कविता देवी, प्रदीप शर्मा सहित अन्यान्य मजदूर नेता द्वारा संबोधित कयल गेल जाहिमे सैकड़ों मजदूर भाग लेलनि।