चिराग पासवान आब कहलनि अछि जे चुनावक बाद नीतीश कुमार बिहारक मुख्यमंत्री होएत। केंद्रीय मंत्री आ लोजपा (रामविलास) पार्टीक अध्यक्ष चिराग पासवान पिछला किछु दिनसँ बिहारक सीएम नीतीश कुमारक नेतृत्ववाला सरकार पर निशाना साधि रहल छलथि।
हालहिमे चिराग दुख प्रकट कएलनि छलथि जे ओ एकटा एहेन सरकारक समर्थन कऽ रहल छथि जतय अपराध बेकाबू भऽ गेल अछि। मुदा आब चिराग पासवानक सुर अचानक बदलल अछि। चिराग पासवान आब कहला अछि जे बिहारमे चुनावक बाद नीतीश कुमार मुख्यमंत्री हेताह।
बिहारक हाजीपुरसँ सांसद आ केंद्रीय खाद्य प्रसंस्करण मंत्री चिराग पासवान पीएम मोदीक प्रति अपन प्रतिबद्धता दोहराओलनि अछि। चिराग सोमदिन कहला- ‘हम कतेको बेर दोहराओल अछि जे हमर प्रतिबद्धता आ प्रेम प्रधानमंत्रीक प्रति अछि। प्रधानमंत्री मोदीक नेतृत्वमे (बिहार में) चुनाव लड़ल जाएत।चुनाव परिणामक पश्चात, नीतीश कुमार पुनः मुख्यमंत्री पदक शपथ लेताह। निश्चित रूपसँ ओ मुख्यमंत्री हेताह।
बीतल किछु समयसँ चिराग पासवान बिहारमे बिगड़ैत कानून व्यवस्था पर सरकार आ प्रशासन पर लगातार हमला क’ रहल छलाह। चिराग प्रशासन पर अपराधीक समक्ष नतमस्तक भेलाक आरोप लगौने छलाह। चिराग कहने छलाह- “हम सरकारसँ समय पर कदम उठेबाक निवेदन करैत छी। हमरा दुख अछि जे हम एहेन सरकारक समर्थन क’ रहल छी जतय अपराध बेकाबू भ’ गेल अछि।”
बिहारमे विधानसभा चुनाव निकट अछि आ एकरा लेल सब राजनीतिक दल अपन-अपन तैयारी शुरू क’ देलक अछि। मानल जाइत अछि जे चुनाव आयोग शीघ्रहि चुनावक तारीख सभक ऐलान क’ सकैत अछि। बिहारमे आगामी अक्टूबर-नवंबरमे 243 विधानसभा सीट सभक लेल चुनाव संभावित अछि। कोनो दलकेँ जीतक लेल 122 सीटक आवश्यकता होयत।
बिहार चुनावमे एहि बेर मुकाबला भाजपा, जदयू, लोजपा (रामविलास), जीतन राम मांझी आ उपेंद्र कुशवाहाक दलक NDA गठबंधन आ राजद, कांग्रेस आ किछु अन्य दलक महागठबंधनक बीच थिक। एकरा अलावा प्रशांत किशोरक जन सुराज आ ओवैसीक एआईएमआईएम सेहो चुनाव मैदानमे अछि।
