पाकिस्तान आ चीनक बाद आब ज्योति मल्होत्राक बांग्लादेश कनेक्शन सेहो आयल सामने

चंडीगढ़ समदिया
*

पाकिस्तान लेल जासूसी करबाक आरोपमे गिरफ्तार हरियाणाक चर्चित यूट्यूबर आ ट्रैवल ब्लॉगर ज्योति मल्होत्राक बारेमे एकटा आर पैघ खुलासा भेल अछि। हरियाणा पुलिस आ जाँच एजेंसी द्वारा कएल गेल जाँचमे ई सामने आयल अछि जे ज्योति पाकिस्तान आ चीन केर बाद बांग्लादेश जएबाक लेल सेहो योजना बना रहल छल। एही बात केर पुष्टि ओहि आवेदन पत्रसँ भऽ रहल अछि, जे ओ बांग्लादेश जाए लेल भरने छल। तथापि, एहि आवेदन पत्रमे तारीख दर्ज नै अछि, जाहिसँ ई जाहिर होय जे ई एप्लीकेशन फॉर्म कखनि भरल गेल छल, मुदा एहिमे अन्य जानकारी दर्ज अछि। प्राप्त जानकारी अनुसार, जाहि तरिकासँ ई फॉर्म भरल गेल अछि, ताहिसँ ई साफ जाहिर भऽ रहल अछि जे हालमे ज्योति मल्होत्रा बांग्लादेश जाए लेल आवेदन कयने छल। एहिसँ पहिने, ज्योति मल्होत्राक एकटा वीडियो सेहो सामने आयल छल, जतय ओ भारत-पाकिस्तान सीमा केर नजदीक थार रेगिस्तानमे रहनिहार स्थानीय लोकसँ भेंट कऽ रहल छल। संगहि, ओ हुनक जीवनशैली बारेमे सेहो पता लगा रहल छल। एतबे नहि, वीडियोमे देखाइत अछि जे ज्योति एही स्थानीय लोकसँ पाकिस्तानक संबंधमे कतेको तरहक सवाल सेहो पुछैत अछि। जेना, अहाँक कोनो रिश्तेदार पाकिस्तानमे रहैत अछि, तँ उत्तरमे कहल जाइत अछि जे हमर सभक कतेको रिश्तेदार पाकिस्तानमे रहैत अछि।

वीडियोमे आगू ज्योति मल्होत्रा भारत आ पाकिस्तानक सीमा पर लगल तारक दिसि इशारा करैत कहैत छथि जे देखू, ई तार अछि। एहि तारकेँ ओहिकातसँ पाकिस्तान शुरू भ जाइत अछि। वीडियोमे साफ देखाइत अछि जे ज्योति मल्होत्रा कतेको लोकसँ भेंट करैत अछि आ हुनकासँ कतेको तरहक सवाल करैत अछि।