देहरादून पहुँचल राष्ट्रपति द्रौपदी मुर्मूक एकटा वीडियो सोशल मीडिया पर वायरल भेल अछि। वीडियोमे दृष्टिबाधित छात्र राष्ट्रपतिक जन्मदिन पर गीत गाबि रहल अछि। एहि पर राष्ट्रपति द्रौपदी मुर्मू भावुक भऽ जाइत छथि आ आँखिसँ नोर खसि पड़ैत छनि।
राष्ट्रपति मुर्मू तीन दिनक यात्रा पर उत्तराखंडक राजधानी देहरादून पहुंचल छथि। खास बात ई अछि कि राष्ट्रपति द्रौपदी मुर्मू शुक्रदिन हुनक जन्मदिनक अवसर पर देवभूमिमे छथि, जतय हुनका राष्ट्रीय दृष्टि दिव्यांजन सशक्तिकरण संस्थान केर छात्रक संग किछु समय बिताबय केर छल । हुनका लेल संस्थान द्वारा एकटा कार्यक्रमक आयोजन कयल गेल छल। एहि दौरान बच्चा सभ गीतक माध्यमसँ जन्मदिनक शुभकामना देलक। एहि दौरान जखनि अलग-अलग क्षमता वाला बच्चा सभ हुनकर जन्मदिन पर बॉलीवुडक प्रसिद्ध गीत ‘बार बार ये दिन आए’ गबैत छल तऽ हुनकर गीत सुनि राष्ट्रपति भावुक भऽ गेलीह आ मंच पर हुनकर आँखिसँ नोर खसि पड़ल।
एकर बाद मंच पर उपस्थित सुरक्षाकर्मी राष्ट्रपतिकेँ टिशू पेपर देलनि, जाहिसँ ओ अपन नोर पोछलनि। सोशल मीडिया पर ई वीडियो वायरल भऽ रहल अछि, जाहि पर यूजर अलग-अलग रिएक्शन दऽ रहल छथि।
उपराष्ट्रपति जगदीप धनखर, प्रधानमंत्री नरेन्द्र मोदीसँ लऽ कए बहुत रास मंत्री तक राष्ट्रपति मुर्मूकेँ सोशल मीडियाक माध्यमसँ हुनकर जन्मदिन पर बधाई देलनि।
उपराष्ट्रपति धनखर सोशल मीडिया प्लेटफॉर्म ‘एक्स’ पर लिखलनि, “भारतक माननीय राष्ट्रपति श्रीमती द्रौपदी मुर्मूक जन्मदिन केर हार्दिक शुभकामना। विनम्र शुरुआतसँ लऽ कऽ उच्चतम संवैधानिक कार्यालय धरि हुनक असाधारण यात्रा विनम्रता, सादगी आ गरिमा प्रतिमूर्ति रहल अछी जे हमर लोकतंत्रक सच्चा भावनाकेँ दर्शाबैत अछि। जनसेवामे हुनक पूरा यात्रा विधायक, राज्यपालक रूपमे आ आब सबसँ पैघ लोकतंत्रक राष्ट्रपतिक रूपमे लगातार एगो अनुकरणीय विरासतक उच्चतम मानक तय कय चुकल अछि।”
पीएम मोदी ‘एक्स’ पर लिखलनि, “राष्ट्रपति द्रौपदी मुर्मूक जन्मदिनक बहुत-बहुत शुभकामना। हुनक जीवन आ नेतृत्व देशभरिमे लाखों लोककेँ प्रेरित करैत अछि। जनसेवा, सामाजिक न्याय आ समावेशी विकासक प्रति हुनक अटूट प्रतिबद्धता सब लेल आशा आर ताकतक किरण अछि। ओ हरदम गरीब आ विपन्न लोककेँ सशक्त बनाबय लेल काज कयलनि। भगवान हुनका जनताक एहिना सेवा लेल दीर्घ आ स्वस्थ जीवन देथिन।
जनतब जे राष्ट्रपति द्रौपदी मुर्मू केर जन्म २० जून १९५८ कऽ ओडिशाक मयूरभंज जिलाक एगो छोट गाँव उपरबेदामे भेल छल। ओ संथाल जनजातिक छथि । हुनक पिता बिरांची नारायण तुडू गामक मुखिया छलाह आ पंचायती राज व्यवस्थासँ जुड़ल छलाह।
