राष्ट्रीय जनता दलक नेता तेजस्वी यादव शनिदिन दावा कयलनि जे राज्यक चारि विधानसभा सीटक उपचुनावमे विपक्षी गठबन्धनक पराजयक बाद बिहारमे अगिला विधानसभा चुनाव विपक्षी गठबन्धन जीतत। बिहार विधानसभामे प्रतिपक्षक नेता तेजस्वी यादव पड़ोसी राज्य झारखण्डमे अपन पार्टीक अपेक्षासँ नीक प्रदर्शनपर प्रसन्नता व्यक्त कयलनि, जतय झारखंड मुक्ति मोर्चाक नेतृत्ववला गठबन्धन सत्ता बरकरार रखलक।
झारखण्ड मे २०१९ केर चुनावमे राजद मात्र चतरा सीट जीतल छल, मुदा एहि बेर ओ देवघर, गोड्डा, बिश्रामपुर आ हुसैनाबाद सीट पर जीत हासिल कयलक।
मुदा एम्हर बिहारमे सत्तारूढ़ राष्ट्रीय जनतांत्रिक गठबंधन (एनडीए) चारु विधानसभा क्षेत्रमे उपचुनाव जीति लेलक अछि।
पटनामे संवाददाता सभसँ बातचीत करैत तेजस्वी यादव कहलनि, “किछु सीट हारब कोनो पैघ बात नहिं अछि। हालक लोकसभा चुनावमे हमसभ एहि निर्वाचन क्षेत्रमे जीत हासिल कयने छलहुँ। हम २०२५ केर विधानसभा चुनावमे बेहतर प्रदर्शन करब आ बिहारमे महागठबंधन अगिला सरकार बनत। जीत आ हार चुनावक हिस्सा अछि। हम बिल्कुल निराश नहिं छी। हम सब एकजुट भऽ कऽ चुनाव लड़लहुं।
राजद बेलागंज आ रामगढ़ सीट बरकरार रखबामे असफल रहल, जखन कि पार्टीक उम्मीदवार इमामगंज सीट सेहो हारि गेलाह। तेजस्वी यादव कहलनि, “हम झारखण्डमे चारिटा विधानसभा सीट जीतलहुं। हेमंत सोरेनक नेतृत्वमे महागठबंधन झारखंड विधानसभा चुनाव भारी अन्तरसँ जीतलक। झारखण्डक बाद २०२५ मे बिहारमे महागठबंधनक सरकार बनत।”
