आम आदमी पार्टी ‘एक राष्ट्र एक चुनाव’ पर अपन विचार उच्च स्तरीय समितिकेँ विचारक लेल भेजलक। आम आदमी पार्टीक राष्ट्रीय सचिव पंकज गुप्ता उच्च स्तरीय समिति, एक राष्ट्र, एक चुनावक सचिव नितेन चन्द्राकेँ पत्र लिखलनि। आप’क कहब अछि जे आम आदमी पार्टी ‘एक देश एक चुनाव’क विचारक कड़गर विरोध करैत अछि।
ओ पत्रमे कहलनि, “एक राष्ट्र एक चुनाव संसदीय लोकतंत्रक विचार, संविधानक मूल संरचना आ देशक संघीय राजनीतिकेँ क्षति पहुँचाओत। ‘एक राष्ट्र एक चुनाव’ त्रिशंकु विधायिकासँ निपटबामे असमर्थ अछि, आ दल-बदल विरोधी आ विधायक/सांसदक खुजल खरीद-फरोख्तक बुराईकेँ सक्रिय रूपसँ प्रोत्साहित करत। एक संग चुनाव करबासँ बचाओल जा रहल लागत भारत सरकारक वार्षिक बजटक मात्र ०.१% अछि।
कांग्रेस अध्यक्ष मल्लिकार्जुन खड़गे शुक्रदिन ‘एक राष्ट्र-एक चुनाव’ विषय पर उच्चस्तरीय समितिकेँ पत्र लिखलनि। पत्रमे ओ कहलनि जे संसदीय सरकार अपनाबयवला देशमे एक संग चुनाव होय एहि विचारक लेल कोनो स्थान नहिं अछि आ हुनकर पार्टी एकर कड़ा विरोध करैत अछि।
ओ ई पत्र उच्च स्तरीय समितिक सचिव नितेन चन्द्राकेँ पठौलनि अछि। एहिमे अपन राय दैत खड़गे कहलनि जे एक संग चुनाव करयबाक विचार संविधानक मूल संरचनाक विरुद्ध अछि। यदि एक संग चुनावक प्रणालीकेँ लागू करबाक अछि तँ संविधानक मूल संरचनामे पर्याप्त परिवर्तनक आवश्यकता होयत। “जाहि देशमे संसदीय सरकारक रूप अपनाओल गेल अछि, ओतय एक संग चुनावक विचारक लेल कोनो स्थान नहिं अछि। एक संग चुनाव करयवला सरकारक एहन रूप संविधानमे निहित संघीयताक गारंटीक विरुद्ध अछि।
