लोकसभा चुनावक बीच बिहारक छपरामे भेल गोलीबारीक घटनासँ राज्यमे राजनीतिक गर्मी बढ़ि गेल अछि। आब एहि बारेमे राजनेताक बीच आरोप-प्रत्यारोपक दौर सेहो शुरू भऽ गेल अछि।
तेजस्वी यादव कहलखिन, “प्रशासन आश्वासन देलक अछि जे एहि घटनामे शामिल दूटा आओर लोककेँ साँझ धरि पकड़ि लेल जायत। किछु लोक हारिक बौखलाहटमे ई करैत छथि। जखनि हम पहिल बेर चुनाव लड़ि रहल छलहुं तखनो हमरा भाजपाक लोक हूटिंग कऽ रहल छलथि। एहि बेर भाजपा साफ अछि।“
वीआईपी केर मुकेश सहनी कहलनि, “हम सभ दलक कार्यकर्तासँ आग्रह करैत छी जे चुनावक दौरान एहेन घटनाक अंजाम नहिं दैथ। सरकारकेँ कानून व्यवस्था देखबाक चाही।”
जदयू केर मुख्य प्रवक्ता नीरज कुमार कहलनि, “इतिहास गवाह अछि जे जखनि-जखनि लालू यादवक परिवार चुनाव लड़लक अछि तखनि-तखनि सामाजिक उपद्रव होइत रहल अछि।“
एतय केर राजद प्रत्याशी रोहिणी आचार्य कहलनि, “हमरासभ पर घातक हमला भेल। भाजपाक गुंडासभ इ कयलक आ हमर तीनटा कार्यकर्ताकेँ गोली मारि देल गेल। एहि लोकक खिलाफ कारवाई होयबाक चाही।“
राजद प्रवक्ता मृत्युंजय तिवारी कहलनि, “लोकतंत्रमे हिंसाक कोनो जगह नहिं अछि। स्थितिकेँ नियंत्रित करब आ कोन लोक लोकतंत्र गला घोंटय चाहैत अछि से चिन्हित करब शासन-प्रशासनख जिम्मेदारी अछि। पुलिस प्रशासन की कए रहल अछि ? जिनकर मृत्यु भेल हुनकर परिवारकेँ मुआवजा भेटबाक चाही।“
छपरा हिंसा पर जदयू केर प्रदेश अध्यक्ष उमेश कुशवाहा कहलनि, “हम एहि घटना पर अधिकारी सबसँ बात कयलहुँ। जांच चलि रहल अछि। जे दोषी होयत ओकरा बख्शल नहिं जाएत। रोहिणी हारिसँ हताश भऽ बूथ पर चलि गेलीह। एकर बाद लोक उग्र भऽ गेल। एहि घटनासँ ई स्पष्ट भऽ गेल अछि जे रोहिणीक हारि निश्चित अछि।“
बतबैत चली जे छपराक भिखारी चौक पर गोलीबारीक घटनाक बाद एहतियात केर रूपमे प्रशासन दू दिनक लेल इंटरनेट सेवा बंद कऽ देलक अछि, जखन कि हर तरफ पुलिस बल तैनात कयल गेल अछि। पुलिस हर गतिविधि पर बारीकीसँ नजरि राखि रहल अछि। पुलिस एहि मामिलामे भाजपा नेता रमाकांत सिंह सोलंकीकेँ हिरासतमे लेलक अछि।
मंगलदिन भोरमे भिखारी चौक पर दूटा समूहक बीच गोलीबारी भेल, जाहिमे एकटाक मृत्यु भऽ गेल आ दू गोटे घायल भऽ गेलाह।
