देशमे सभ गैस रिफाइनरी उच्च क्षमता पर, पर्याप्त स्टॉक उपलब्ध : मंत्रालय

नई दिल्ली। समदिया

सरकार मंगलकेँ बतौलक कि देशक सभ गैस रिफाइनरी पूरा क्षमताक संग काज कय रहल अछि आ सोमदिन धरि 18,700 टन कमर्शियल एलपीजीक आपूर्ति कयल जा चुकल अछि। अंतर-मंत्रालयी ब्रीफिंगमे पेट्रोलियम आ प्राकृतिक गैस मंत्रालयक संयुक्त सचिव सुजाता शर्मा कहलनि कि सभ रिफाइनरी उच्च क्षमता पर चलि रहल अछि आ देशमे पेट्रोल आ डीजलक पर्याप्त स्टॉक मौजूद अछि। सरकार देशभरिमे पीएनजी कनेक्शन बढ़ाबय पर सेहो जोर देल जा रहल अछि। ओ बतौलनि कि पेट्रोलियम आ प्राकृतिक गैस नियामक बोर्ड (पीएनजीआरबी) सिटी गैस डिस्ट्रीब्यूशन (सीजीडी) कंपनीकेँ निर्देश देलक अछि कि जतय सुविधा उपलब्ध होय, ओतय 5 दिनक भीतर स्कूल, कॉलेज आ आंगनवाड़ी किचनमे पीएनजी कनेक्शन देल जाय। हुनक अनुसार, सोमकेँ देशक 110 प्रमुख क्षेत्रमे करीब 7,500 घरेलू आ व्यावसायिक पीएनजी कनेक्शन देल गेल। शर्मा कहलनि, देशमे 1 लाखसँ बेसी पेट्रोल पंप अछि आ ज्यादातर सामान्य रूपसँ काज कय रहल अछि, जतय पेट्रोल आ  डीजलक पर्याप्त स्टॉक उपलब्ध अछि। ओ कहलनि कि एलपीजीक सप्लाई सुनिश्चित करय केर सभ संभव प्रयास कयल जा रहल अछि आ सरकार आपूर्तिक स्रोतकेँ बढ़ाबय पर सेहो काज कय रहल अछि ताकि स्थिति स्थिर बनल रहय। संगही, राज्यसँ निगरानी आ व्यवस्थाकेँ मजबूत करबाक अपील कयल गेल अछि। मार्चक पहिल तीन हप्तामे 3.5 लाखसँ ज्यादा घरेलू आ व्यावसायिक पीएनजी कनेक्शन देल गेल अछि, जखनि कि एलपीजी सिलेंडरक डिलीवरी सामान्य रूपसँ जारी अछि आ घबराहटमे बुकिंगमे काफी कमी आयल अछि। वर्तमानक भू-राजनीतिक हालातकेँ देखैत एलपीजी सप्लाई पर लगातार नजरि राखल जा रहल अछि, मुदा कतौ गैस खत्म होयबाक स्थिति सामने नहि आओल अछि। ऑयल मार्केटिंग कंपनी केर अनुसार, कोनो भी पेट्रोल पंप पर ईंधनक कमी नहि अछि आ सप्लाई नियमित रूपसँ जारी अछि। सरकार लोकसँ अपील कएलक अछि जे जनता घबराहटमे खरीदारी नहि करय, कारण पर्याप्त स्टॉक उपलब्ध अछि। जरूरी सेक्टरकेँ प्राथमिकता देल जा रहल अछि, जाहिमे घरेलू पीएनजी आ सीएनजी ट्रांसपोर्टकेँ 100 प्रतिशत सप्लाई देल जा रहल अछि, जखनि कि औद्योगिक आ व्यावसायिक उपभोक्ताकेँ करीब 80 प्रतिशत सप्लाई देल जा रहल अछि।