बिहार लोक सेवा आयोग (बीपीएससी) केर ७०म संयुक्त प्रारंभिक परीक्षा रद्द करबाक माँग करैत अभ्यर्थी पिछला कतेको दिनसँ प्रदर्शन कऽ रहल छथि। रविदिन प्रदर्शनक दौरान पुलिस आ उम्मीदवारक बीच झड़प भेल छल। पुलिस प्रदर्शनकारी पर पानिक तोपक प्रयोग कयलक आ छात्रसभ पर लाठीचार्ज कयलक। एहिसँ पहिने पप्पू यादव, प्रशांत किशोर, राजद नेता तेजस्वी यादव छात्रक समर्थनमे आयल छलाह। आब एनडीए केर सहयोगी आ लोजपा (आर) नेता चिराग पासवान उम्मीदवारक मुद्दा पर बिहारक मुख्यमंत्री नीतीश कुमारसँ हस्तक्षेपक मांग कयलनि अछि।
चिराग पासवान एकटा एक्स पोस्टमे लिखलनि, “बिहारक युवा आ बीपीएससी अभ्यर्थीक मुद्दा केर लऽ कऽ एनडीए सरकारक प्रमुख सहयोगी होबए केर कारण हम बिहार सरकार आ माननीय मुख्यमंत्री नीतीश कुमारजीसँ तत्काल हस्तक्षेप करय केर अपील कयलहुँ अछि, जेकर परिणामस्वरूप सरकारक तरफसँ मुख्य सचिव (जे सरकार के सर्वोच्च अधिकारी छथि) उम्मीदवार आ छात्रक संग बातचीत केर प्रक्रिया शुरू कयलनि अछि। जल्दिये एहि पहलक सार्थक परिणाम देखल जायत। ई हमर सरकारक सकारात्मक सोच आ छात्रक प्रति संवेदनशीलताक परिणाम अछि।”
पासवान कहलनि, “हम उम्मीदवारसभसँ सेहो अपील करैत छी जे ओ शांतिपूर्ण आ रचनात्मक तरीकासँ सरकारक समक्ष अपन बात रखथि आ कोनो राजनीतिक व्यक्ति द्वारा गुमराह होयबासँ बचथि। ई मुद्दा विशुद्ध रूपसँ युवाक भविष्य आ बिहारक विकाससँ जुड़ल अछि, जकर समाधान राजनीतिसँ ऊपर राखि करबाक चाही।”
केन्द्रीय मंत्री चिराग पासवान कहलनि, “हमर पार्टी हर डेग पर युवाक संग ठाढ़ अछि। किछु राजनीतिक व्यक्ति आ दल जे छात्रसभकेँ गुमराह करबाक प्रयास कऽ रहल छथि ओ गलत छथि, छात्रसभक उपयोग अपन राजनीतिक लाभक लेल करब उचित नहि अछि। माननीय मुख्यमंत्री स्वयं एहि मामिलासँ अवगत छथि, सरकार छात्रक हर सम्भव मदति करबाक प्रयास कऽ रहल अछि।”
चिराग पासवान कहलनि, “काल्हि पटनामे छात्रसभ पर लाठीचार्ज आ पानिक तोपक प्रयोगक हम कहियो समर्थक नहि रहब, पुलिसकेँ संयम रखबाक चाही। छात्र लोकनि अपन माँग लऽ कऽ सड़क पर उतरल छथि तखनि हुनका पर लाठीचार्ज आ पानिक तोपक प्रयोग नहि करैत शांतिपूर्ण तरीकासँ समझा कय समस्याक समाधान करबाक प्रयास करबाक चाही। हम मुख्यमंत्रीकेँ इहो कहलहुँ अछि जे एहेन पुलिस अधिकारीक विरुद्ध सेहो कानूनी कारवाई कयल जाय जे एहेन कृत्यमे संलिप्त पाओल जाइत अछि।”
