पश्चिमी विक्षोभक कारण उत्तर भारतमे बरखा भS रहल अछि। मौसम वैज्ञानिक सोमा सेन रॉय कहलनि अछि जे आबयवला दिनमे उत्तर भारतमे भयंकर जाड़ पड़त। संगहि, पहाड़ी राज्यमे भारी बरखाक ऑरेंज अलर्ट जारी कयल गेल अछि। मौसम विभागक पूर्वानुमानक बाद अगिला किछु दिन धरि कतेको राज्यमे घना कुहेस रहत।
सोमा सेन कहलनि, “एकटा मजबूत आ तीव्र पश्चिमी विक्षोभ उत्तर भारत धरि पहुँचि गेल अछि। अरब सागर आ बंगालक खाड़ीसँ नमीक सम्पर्कमे अयलासँ उत्तर, मध्य आ पश्चिम भारतमे गरजक संग बरखा भऽ रहल अछि। हिमाचल प्रदेश, जम्मू-कश्मीर, उत्तराखंड आ पूर्वी मध्य प्रदेशमे भारी बरखा, बर्फबारी आ ओलावृष्टिक लेल ऑरेंज अलर्ट जारी कयल गेल अछि। उत्तर भारतमे तापमानमे ३-५ डिग्री सेल्सियसक गिरावट आबय लागत। जम्मू-कश्मीर, हिमाचल प्रदेश, पंजाब, हरियाणा आ राजस्थानमे भयंकर शीतलहरक स्थिति रहत।”
अगिला दू दिन धरि तापमानमे ३-५ डिग्री सेल्सियसक कमी होयत। जम्मू-कश्मीर, लद्दाखमे कतेको ठाम न्यूनतम तापमान शून्यसँ नीचा दर्ज कयल गेल। मैदानी क्षेत्रमे सबसँ कम न्यूनतम तापमान राजस्थानक चुरूमे ५.४ डिग्री सेल्सियस दर्ज कयल गेल। देशक कतेको राज्यमे शनिकेँ बरखा भेल अछि। संगहि हरियाणा, तमिलनाडु आ जम्मू-कश्मीरक कतेको क्षेत्रमे भारी बरखाक भविष्यवाणी कयल गेल अछि। विदर्भ, जम्मू-कश्मीर, पंजाब, पूर्वी उत्तर प्रदेश आ राजस्थानमे घना कुहेसा छाओल रहल।
मौसम विभागक अनुसार अगिला किछु दिन धरि देशक कतेको भागमे कुहेस रहत। आइ रविकेँ पंजाब, हरियाणा आ राजस्थानमे घनासँ बहुत घना कुहेसा रहत। हिमाचल प्रदेश, उत्तर प्रदेश, मध्य प्रदेश, झारखंड, असम, मेघालय, नागालैंड आदि राज्यमे सेहो कुहेस रहत। तहिना ३० आ ३१ दिसम्बरकेँ कतेको राज्यमे एहने स्थिति बनल रहत।
