कांग्रेस नेता आ सदनमे विपक्षक नेता राहुल गांधी भारत जोड़ो यात्राक दोसर वर्षगांठक अवसर पर सोशल मीडिया प्लेटफॉर्म ‘एक्स’ पर एकटा वीडियो साझा कऽ यात्राक अपन अनुभव साझा कयलनि। राहुल गाँधी एकरा भारत माताक सच्चा प्रतिनिधि सेहो बतौलनि।
राहुल गांधी ‘एक्स’ पर साझा वीडियोक विषयमे पोस्टमे लिखलनि, “भारत जोड़ो यात्रा हमरा मौनक सुन्दरताक बारेमे सिखौलक अछि। जयजयकार आ नाराक बीच हमरा शोरकेँ अनदेखा कय अपन बगलमे बैसल व्यक्ति पर ध्यान केन्द्रित करबाक शक्ति भेटल। एहि १४५ दिनमे, आ तहियासँ दू साल धरि हम अलग-अलग पृष्ठभूमिसँ हजारो भारतीयकेँ सुनलहुँ। प्रत्येक आवाजमे किछु ने किछु ज्ञान छल जे हमरा किछु नव सिखबैत छल, आ प्रत्येक आवाज हमर प्रिय भारत माताक प्रतिनिधित्व करैत छल।
ओ कहलनि, “ई यात्रा साबित कऽ देलक जे भारतीय स्वभावसँ प्रेम करैत छथि। जखनि हम एहि यात्राक आरम्भ कयलहुँ तखनि हम कहने छलौंह जे प्रेम नफरत पर विजय प्राप्त करत, आ उम्मीद डर केर मात देत। आइयो हमर मिशन वैऽह अछि – ई सुनिश्चित करब जे भारतक माताक आवाज, प्रेमक आवाज, हमर प्रिय देशक कोन-कोना धरि पहुँचय।”
कांग्रेस अध्यक्ष मल्लिकार्जुन खड़गे सेहो एक्सक सोशल मीडिया अकाउंट पर पोस्ट कयलनि, “भारत जोड़ो यात्रा एकटा ऐतिहासिक जन आन्दोलन अछि, जे समाजकेँ एकजुट करबाक पर्याय बनि गेल अछि। राहुल गाँधी आ हमर भारत जोड़ो यात्री कन्याकुमारीसँ कश्मीर धरि पैदल जे दुरी तय कयलनि ओहिसँ करोड़ो लोकक हृदयमे प्रेम, आपसी सद्भाव आ भाईचाराक अभूतपूर्व जनचेतना जागि गेल। भारत जोड़ो यात्राक दोसर वर्षगाँठक अवसर पर हम देशवासीसँ मात्र संविधान आ लोकतंत्रक संरक्षणक लेल संघर्ष जारी रखबाक अपील करैत छी। आर्थिक असमानता, मुद्रास्फीति, बेरोजगारी, सामाजिक अन्याय, संविधानक विनाश, शक्तिक केन्द्रीकरणक वास्तविक मुद्दा पर हमर संघर्ष जारी अछि। न्याय, स्वतंत्रता, समानता आ बंधुत्वक अपन संवैधानिक मूल्यक रक्षाक संकल्पकेँ मजबूत करबाक चाही। हम घृणा आ विभाजनक एजेंडा केर सफल नहिं होबए देब। प्रेम आ मानवताक जीत निश्चित अछि।”
ओ आगू लिखलनि कि, कांग्रेस पार्टी थम्हत नहिं, रुकत नहिं। भारत माताक आवाज हमर आवाज अछि।
जनतब जे राहुल गाँधी कन्याकुमारीसँ कश्मीर धरि ३,५७० किलोमीटरक यात्रा पूरा कयने छलथि।
