राष्ट्रीय लोक मोर्चा (आरएलडी)क अध्यक्ष उपेन्द्र कुशवाहाकेँ भाजपा राज्यसभा भेजि रहल अछि। बतबैत चली जे उपेन्द्र कुशवाहा लोकसभा चुनाव २०२४ काराकाट सीट हारि गेल छलथि।
आब जानकारीक अनुसार भारतीय जनता पार्टी हुनका अपन कोटासँ राज्यसभाक टिकट देत। उपेन्द्र कुशवाहा एनडीएक हिस्सा छथि। ओ पूर्वमे मोदी सरकारमे केन्द्रीय मंत्रीक रूपमे सेहो काज कऽ चुकल छथि।
जखन बिहारक उपमुख्यमंत्री सम्राट चौधरीसँ सवाल भेल जे की आरएलएम अध्यक्ष उपेन्द्र कुशवाहा राज्यसभाक लेल एनडीए उम्मीदवार होयताह ? एहि पर बिहारक उपमुख्यमंत्री सम्राट चौधरी कहलनि जे एनडीएमे सब कियो सहमत छथि जे उपेन्द्र कुशवाहा उम्मीदवार होयताह।
राज्यसभामे पठाओल जयबाक खबरिक बीच उपेन्द्र कुशवाहा सेहो प्रतिक्रिया देलनि अछि। ओ कहलनि “बिहारक जनता आ राष्ट्रीय लोक मोर्चा सहित राजगक सभ घटक दलक कार्यकर्ता जे प्रतिकूल परिस्थितिमे सेहो हमरा प्रति स्नेह कायम रखलनि, राज्यसभा सदस्यताक लेल हमर उम्मीदवारीक घोषणा करबाक लेल बिहारक जनता, भारतक प्रधानमंत्री नरेन्द्र मोदी, बिहारक मुख्यमंत्री नीतीश कुमार, अमित शाहकेँ धन्यवाद। जेपी नड्डा, चिराग पासवान, जीतन राम मांझी, सम्राट चौधरी आ एनडीए केर अन्य नेता आ कार्यकर्ताक प्रति हमर हार्दिक आभार।”
उपेन्द्र कुशवाहा काराकाट लोकसभा सीटसँ चुनाव लड़लनि। इंडिया’क राजाराम कुशवाहा एहि सीटसँ चुनाव जीति संसद पहुँचल छथि। राजाराम निर्दलीय उम्मीदवार पवन सिंहकेँ १०५८५८ मतसँ पराजित कयलनि। भाजपाक सहयोगी राष्ट्रीय लोक मोर्चाक उपेन्द्र कुशवाहा २५३८७६ मतक सङ्ग तेसर स्थान पर छलाह।
