जम्मू-कश्मीरक कुलगाम जिलामे आतंकीक खिलाफ सुरक्षा बलक अभियान लगातार तेसर दिन (रविदिन) जारी रहल। जारी मुठभेड़क दौरान सुरक्षा बल 3 आतंकीकेँ मारि गिरौलक।
सेना, सीआरपीएफ आ जम्मू-कश्मीर पुलिसक संयुक्त टीम शुक्रदिन कुलगामक अखाल वन क्षेत्रमे खुफिया जानकारीक आधार पर तलाशी अभियान शुरू कयलक। इलाकाक घेराबंदीक बाद सुरक्षा बल पर गोलीबारी भेल, जकर बाद मुठभेड़ शुरू भऽ गेल।
शुक्रदिन एहि मुठभेड़मे एकटा आतंकी मारल गेल, जखनि कि दोसर आतंकी शनिदिन मारल गेल। रविदिन तेसर आतंकी सेहो मारल गेल। पुलिस अधिकारीक कहब छल जे एहि इलाकामे एखनो आओर आतंकी नुकायल भऽ सकैत अछि, ताहि लेल ई अभियान जारी रहत।
घाटीमे आतंकीक खिलाफ सुरक्षा बलक आक्रामक अभियान जारी अछि। सीमा पर सेना हाई अलर्ट पर अछि आ एलओसी पर कड़ा नजरि राखल जा रहल अछि।
28 जुलाईकेँ श्रीनगरक हरवान क्षेत्र केर दचिगम नेशनल पार्कमे ‘ऑपरेशन महादेव’ केर तहत तीन पाकिस्तानी आतंकी मारल गेल छल। एहि आतंकीमे लश्कर-ए-तैबाक कमांडर सुलेमान शाह आ दूटा साथी अबू हमजा आ जिब्रान शामिल छल। 22 अप्रैलकेँ पहलगाममे भेल हमलामे इ तीनू आतंकी शामिल छल, जाहिमे 26 निर्दोष लोकक मौत भऽ गेल।
ठीक दोसर दिन 29 जुलाईकेँ सेना ‘ऑपरेशन शिव शक्ति’ शुरू कयलक, जाहिमे दूटा आओर आतंकी मारल गेल। पहलगाम हमलाक बाद सुरक्षा बल आतंकीक संग-संग ओकर सहयोगी, भूमिगत कार्यकर्ता आ समर्थकक खिलाफ अभियान तेज कय देने अछि।
