विश्व प्रसिद्ध गंगोत्री आ यमुनोत्री धामक कपाट अक्षय तृतीयाक पावन पर्व पर श्रद्धालु सभक दर्शन लेल खोलल गेल। आब निरंतर छह महिना तक गंगोत्री धाममे मां गंगाक दर्शन होएत।
बुध दिन भोर 10 बाजि कऽ 30 मिनट पर श्रद्धालु सभक लेल गंगोत्री धामक कपाट खोलल गेल। प्रधानमंत्री नरेंद्र मोदीक नामसँ पहिल पूजा भेल। कपाटोद्धघाटन केर मौका पर पूरा गंगोत्री धाम मां गंगे केर जयकारासँ गूंजि उठल।
एहि मौका पर मुख्यमंत्री पुष्कर सिंह धामी गंगोत्री धाम पहुँचि मां गंगा केर दर्शन कयलन्हि। यमुनोत्री आ गंगोत्री धामक कपाट खुलैत उत्तराखंडमे चारि धाम यात्रा केर श्री गणेश भऽ गेल। बुध दिन कपाट खुललाक मौका पर मां गंगाक दर्शन केर लेल देशक विभिन्न प्रांतसँ श्रद्धालु गंगोत्री धाम पहुँचल।
ई श्रद्धालु सभ मां गंगा केर विग्रह मूर्तिक दर्शन क’ पुण्य लाभ अर्जित कएलन्हि। एहि मौका पर गंगोत्री मंदिर परिसरकेँ करीब 15 कुंटल फूल सभसँ सजाओल गेल। आब श्रद्धालु छह महिना तक गंगोत्री धाममे मां गंगा केर दर्शन कय सकैत छथि।
तीर्थयात्री सभक सुरक्षा लेल व्यापक इंतजाम कएल गेल अछि। चप्पा-चप्पा पर आतंकवाद निरोधक दस्ता, अर्धसैनिक बल आ पुलिसकर्मी लोकनिक नजरि रहत। यात्री सभक सुरक्षा लेल 10 कंपनी पैरामिलिट्री, 17 कंपनी पीएसी संगे 10 स्थान पर आतंकवाद निरोधक दस्ता तैनात रहत।
65 स्थान पर एसडीआरएफ केर टीम सब तैनात रहत। यात्री सभक सुरक्षा लेल केंद्र सरकारक तरफसँ 10 कंपनी पैरामिलिट्री फोर्स उपलब्ध कराएल जा रहल अछि जे जल्दीए भेटत। तहिना पीएसी केर 17 कंपनी आ छह हजार पुलिसकर्मीक ड्यूटी चारिधाम यात्रामे लगाओल गेल अछि। पूरा यात्रा रूटकेँ ड्रोनसँ कवर कएल जाएत। 2000 सीसीटीवी कैमराक माध्यमसँ यात्रा रूट पर सुरक्षा आ यातायातक निगरानी कएल जाएत। अलग-अलग क्षेत्रसँ कंट्रोल रूममे फीड आबि रहल अछि।
