मिथिला क्षेत्रीय बिहारक मधुबनी जिलाक जयनगर थाना क्षेत्रक दुल्लीपट्टी-छपरी रोड पर शनिदिन एकटा सुनसान जगह पर अज्ञात अपराधी द्वारा एकटा युवककेँ दिनदहाड़े गोली मारि हत्या कऽ देल गेल। मृतकक पहिचान खजौली थाना क्षेत्रक हाट लगक वार्ड २ निवासी राम लखन साफीक रूपमे भेल अछि। एहि संबंधमे मृतकक पत्नी जयनगर पुलिस थानामे प्राथमिकी दर्ज कयलनि अछि।
कहल जा रहल अछि जे एहि युवकक हत्या प्रेम सम्बन्धमे कयल गेल अछि। पुलिस एकर जाँच प्रथम दृष्टया अवैध प्रेम सम्बन्धक रूपमे कऽ रहल अछि।
जानकारीक अनुसार राम लखन साफी गुजरातमे काज करैत छलथि। ओ तीन-चारि दिन पहिने गाम आयल छलाह। शनिकेँ दिनक लगभग दस बजे ओ घरक समानक सूची बनौलनि आ ई कहि घरसँ निकलि गेलाह जे खजौली बजारसँ सामान कीनय जा रहल छी। मुदा, ओ जयनगर क्षेत्रक हरुसबारक निवासी अपन कथित प्रेमिकाक सङ्ग स्कूटीसँ जयनगर लेल प्रस्थान कयलनि। जखन ओ दुल्लीपट्टी-छपरारीक बीच पहुँचलाह तखन अज्ञात अपराधी हुनका एकटा सुनसान जगह पर गोली मारि देलक। जाहिसँ ओ मरि गेलाह।
घटनाक सूचना भेटैत पुलिस घटनास्थल पर पहुँचि गेल। शव केर कब्जामे लेल गेल आ पोस्टमार्टमक लेल भेज देल गेल। एतय मृतकक परिवारक बयानक आधार पर पुलिस हरसुबारक निवासी कथित प्रेमिकाकेँ गिरफ्तार कयलक अछि।
डीएसपी विप्लव कुमार कहलनि अछि जे प्रथम दृष्टया ई अवैध प्रेम सम्बन्धक मामिला अछि। एहि मामिलाक जाँच करबाक लेल मुजफ्फरपुरसँ एकटा जाँच दल सेहो आयल छल। तकनीकी जांच कएल जा रहल अछि। बहुत जल्दिये पूरा बात सामने आबि जाएत। अपराधीक पहिचान कएल जा रहल अछि। अपराधी भागि नहिं सकत। मृतकक पत्नी जयनगर पुलिस स्टेशनमे एफआईआर दर्ज करौलनि अछि।
