साधारणतः ज्योतिषमे शनिक ढ़ैया आ शनिक साढ़ेसाती कष्टप्रद होइत छैक। शनिकेँ न्यायक देवता अर्थात न्यायाधीश कहल गेल छनि आ ओ अपन अनुकूल एवं प्रतिकूल प्रभाव छोड़िते टा छथि। कहल जाइत छैक जे शनि जातककेँ ढ़ैया एवं साढ़ेसातीक समयमे कयल गेल अपराधक दंड दैत छथि आ शुद्ध बनबैत छथि, तें जातकक लेल शनिक साढ़ेसाती आ ढ़ैया केर समय प्रायः कष्टप्रद होइत छैक।
पिछला प्रायः पौने दू वर्षसँ एहि राशिवालाकेँ ढ़ैया चलि रहल अछि आ थोड़ेक कष्टप्रद समय अछि, मुदा आब एहि दिनांकसँ एहि दुनू राशिक ढ़ैया समाप्त भऽ रहल अछि आ संगहि संग कष्टक समय सेहो समाप्त होएत। हँ, जाहि दू टा राशिक ढ़ैयाक संदर्भमे कहल जा रहल अछि, ओ राशि अछि कर्क आ वृश्चिक। अर्थात कर्क आ वृश्चिक राशि वाला जातकेँ पिछला प्रायः पौने दू सालसँ ढ़ैयाक रुपमे कष्टप्रद समय चलि रहल अछि जे कि आब एहि दिनांकसँ समाप्त होबएवाला अछि। संगहि संग एखनि मकर, कुंभ आ मीन राशिवालाकेँ शनिक कष्टप्रद समय साढ़ेसाती चलि रहल अछि, मुदा एहिमेसँ मकर राशिक साढ़ेसाती सेहो एहि दिनांकसँ समाप्त भऽ रहल अछि, मुदा कुंभ आ मीन राशिक साढ़ेसाती चालू रहत आ एहि दिनांकसँ मेष राशिक साढ़ेसाती सेहो शुरू भऽ जाएत।
अर्थात दिनांक २९ मार्च २०२५ इस्वीसँ शनिक राशि परिवर्तन भऽ रहल अछि आ एहि दिनांकसँ कर्क आ वृश्चिक राशिवालाकेँ ढ़ैया समाप्त होएत अर्थात कष्टक समय समाप्त होएत, तहिना मकर राशिवालाक पिछला साढ़े सात सालसँ चलि रहल शनिक साढ़ेसातीक कष्टप्रद समय समाप्त भऽ रहल अछि, यानि दिनांक २९-०३-२०२५ सँ कर्क, वृश्चिक आ मकर राशिवालाक शनिक कष्टप्रद समय समाप्त भऽ रहल अछि, ताधरि शनिक शांतिक उपाय करैत रही।
०१) कर्क, वृश्चिक आ मकर राशिक जातकक शनिक कष्टप्रद समय समाप्त।
०२) कुंभ राशिक जातकक आओर अढ़ाई वर्ष धरि साढ़ेसाती रहत।
०३) मीन राशिक जातकक आओर पाँच वर्ष धरि साढ़ेसाती रहत।
०४) मेष राशिक जातकक साढ़ेसाती शूरु होएत आ साढ़ेसात वर्ष धरि रहत।
विशेष : ढ़ैया वा साढ़ेसाती जन्मराशिसँ प्रायः देखबाक चाही। ढ़ैया आ साढ़ेसातीक समय कष्टप्रद अवश्य कहल गेल अछि, मुदा कुंडलीमे शनिक मजगुत स्थितिसँ ई कम प्रभावी होइत छैक, तहिना अन्य अनुकूल प्रभावी ग्रहक एहि समयमे प्रभावक कारण सेहो स्थितिमे सुधार रहैत छैक, जेना शनिक दशा-महादशामे ढ़ैया वा साढ़ेसातीक प्रवेश शुभ मानल जाइत अछि।
शनिक शांतिक उपाय करैत रहू, चरित्र निर्मल राखी, सभ प्रकारक संघर्ष अनुकूल फलदाई होयत।
जनतब ०१ : एहि मैथिली अखबारक सालाना सब्सक्राइबर (पाठक) निःशुल्क शनिक शांतिक स्वतः करएवाला सहज उपायक लेल ह्वाट्सएप नंबर 7480018873 पर संदेश छोड़ू। समय भेटिते मार्गदर्शन संदेश भेटत। सालाना सब्सक्राइबर नहिं छी तऽ पहिने बनय लेल सेहो संदेश छोड़ि सकैत छी।
जनतब ०२ : जानकी नवमी १७ मई तकक लेल बम्पर ऑफर, मैथिल पुनर्जागरण प्रकाश ऑनलाइन सालाना सब्सक्रिप्शन जे लेब तिनकर ८० SQCM तकक बनल विज्ञापनक निःशुल्क प्रकाशन। ह्वाट्सएप नंबर 7480018873 पर संदेश भेजी मात्र।
