मैथिल पुनर्जागरण प्रकाश समाचार बुलेटिन केर शतक (100वाँ अंक) आई 17 जुलाई (बृहस्पति) के पूरा भ गेल। एहि अवसर पर समाचार वाचक एवं प्रस्तोता सुमित सौरभ एवं पूरा टीम केर अभिनन्दन करैत मिथिला – मैथिलीक लेल अपन सर्वस्व आहूत करबाक लेल तत्पर ‘मिथिलाक्षर साक्षरता अभियान’क माध्यमे हजारों – हजार अभियानीकें मिथिलाक्षर सिखा कए मृतप्राय मिथिलाक्षर लिपिकेँ पुनर्जीवन प्रदान करबाक ऐतिहासिक काज केनिहार आओर चारि साल सौं बेसी समयसँ प्रकाशित भऽ रहल राष्ट्रीय मैथिली दैनिक ‘मैथिल पुनर्जागरण प्रकाश’ केर सम्पादक पं. अजय नाथ झा शास्त्री कहलनि जे मैथिलीमे प्रस्तुत आ प्रसारित ई टटका समाचार बुलेटिन एकटा बहुत पैघ उपलब्धि थिक। ओ मैथिली भाषा अनुरागी आओर मैथिल समाजक सतत सहयोगक प्रति आभार व्यक्त करैत कहलन्हि जे “एहि अवसर पर हम समग्र मिथिला वासी केर हार्दिक अभिनन्दन करैत छियैन्ह।”
ज्ञातव्य अछि जे पं. अजय नाथ झा शास्त्री ‘गुरुजी’ किछुए समय मात्र 45-46 घंटाक लेल पटना अएलाह।मुदा अपन संक्षिप्त प्रवासक दौरान ओ ‘मैथिल पुनर्जागरण प्रकाश फोरम’ केर गतिविधि, प्रगति आ उन्नतिक जे उत्साहवर्द्धक कार्य योजना प्रस्तुत कएलन्हि ताहिसँ सभमे भरपूर आत्मविश्वास अवश्य जागृत होयत। यद्यपि एकटा बैसारक निमित्त ओ बहुत जल्दीए पुनः अओताह तकर संभावना अछि।
