प्रधानमंत्री नरेन्द्र मोदी सैम पित्रोदा द्वारा कथित रूपसँ नस्लवादी टिप्पणी करबाक लेल कांग्रेस आ राहुल गाँधीपर हमला कयलनि अछि। ओ कहलनि ” शहजादाक (राहुल गाँधी) फिलोसोफर अंकल (सैम पित्रोदा) त्वचाक रंगक आधार पर हमर देशक लोकक अपमान कय रहल छथि। देश ई अपमान बर्दाश्त नहिं करत, आ मोदी तऽ किन्नहुँ नहिं करत। शहजादाकेँ एकर जवाब देबए पड़त।”
प्रधानमंत्री नरेन्द्र मोदी कहलनि जे इएह कारण अछि जे कांग्रेसक लोक रंगक आधार पर राष्ट्रपति द्रौपदी मुर्मूकेँ हराबय चाहैत छल। प्रधानमंत्री नरेन्द्र मोदी तेलंगानाक वारंगलमे एकटा सभाकेँ सम्बोधित कऽ रहल छलाह। एतय प्रधानमंत्री नरेन्द्र मोदीक भाषणक तेलुगुमे अनुवाद सेहो होइत छल।
प्रधानमंत्री मोदी कहलनि, “कांग्रेस झूठक एतेक पैघ मास्टर अछि, तेलंगानासँ नीक केकरा पता होएत। कांग्रेस अपन सबसँ पैघ नेताक जन्मदिनसँ पहिने किसानक ऋण माफ करबाक वचन देने छल। की ओ झूठ बाजल कि नहिं ? आब ई लोक सभ अपन वादा १५ अगस्त तक टालि रहल छथि जाहिसँ लोकसभा चुनाव खतम भ जाए, आ तखनि इ सभ हाथ उठा लैथि, की इ अहाँक संग धोखा नहिं अछि ? ई लोक सभ ओ लोक छथि जे सनातनकेँ गारि दैत छथि।
प्रधानमंत्री नरेन्द्र मोदी कहलनि, कांग्रेसक ‘शहजादा’, जहियासँ राफेल मुद्दा बंद भऽ गेल छल, ओ पिछला पांच सालमे हर समय ‘५ उद्योगपति’ केँ बारेमे बात करय लगलाह। बादमे ओ ‘अम्बानी-अडानी’ कहय लगलाह, मुदा चुनावक घोषणाक बाद ओ ‘अम्बानी-अदानी’केँ गारि देनाइ बन्द कऽ देलनि, हम हुनका सँ पूछय चाहैत छी, जे शहजादा, अहाँ अंबानी-अडानीसँ कतेक माल लेलौंह अछि’। जाहिसँ समझौता भेल अछि जे अहाँ अचानक ‘अंबानी-अडानी’केँ गारि देनाइ बंद कऽ देलहुँ ?
