आइएनडीआइए गठबंधनक सांसदक निलंबनक विरुद्ध जन्तर-मन्तर पर धरना

नई दिल्ली

*

इंडिया गठबंधनक दल सांसदक निलम्बनक विरोधमे जंतर-मंतर पर धरना देलनि। कांग्रेस अध्यक्ष मल्लिकार्जुन खड़गे, एनसीपी प्रमुख शरद पवार आ कांग्रेस नेता राहुल गांधी सेहो धरनास्थल पर पहुँचलाह। राकांपा प्रमुख शरद पवार कहलनि, “लोकतंत्रकेँ बचाबय लेल हम कोनो मूल्य चुकयबा लेल तैयार छी।”

राहुल गांधी कहलनि, “हम सब विपक्षक नेता आ विपक्षक कार्यकर्ता एक संग ठाढ़ छी। ई लड़ाई नफरत आ मोहब्बतक बीच लड़ाई अछि। हम नफरतक बाजारमे मोहब्बतक दोकान खोलि रहल छी। जतेक बेसी अहां नफरत पसारब, ओतेक इंडिया गठबंधन मोहब्बत पसारत।”

आगा राहुल गांधी कहलनि, “किछु दिन पहिने दू-तीन युवक संसद भवनक भीतर कूदि गेलाह। हम सभ हुनका कूदैत देखलहुं। ओ सभ भीतर आबि गेलाह, किछु धुआँ पसारलनि, भाजपा के सभ सांसद भागि गेलाह। जे अपनाकेँ देशभक्त कहैत छथि, हुनकर हवा निकलि गेल। ओ भीतर कोना आयल ? ओ संसदक भीतर गैस सिलेंडर लऽ अनलक ? ओ एकर विरोध किएक केलक ? ओकर कारण की छल ? बेरोजगारी ! एहि देशक युवाकेँ आइ रोजगार नहिं भेटि सकैत अछि।”

 

कांग्रेसक राष्ट्रीय अध्यक्ष मल्लिकार्जुन खड़गे कहलनि, “संविधानमे उच्च पद धारण कयनिहार लोक कहैत छथि जे हमर जातिक कारणेँ हमर अपमान कयल जा रहल अछि, जँ अहाँक ई हाल अछि तखन हमरा सन दलितक की हाल होयत ? जखन हम सदनमे बजबाक लेल उठैत छलहुं तखन ओहि समय हमरा बजबाक मौका नहिं देल जाइत छल। तखन हम की कही जे ई भाजपा लोक, भाजपा सरकार एकटा दलितकेँ बाजय नहिं दैत अछि ? की हम एना कही ?”

 

राजद सांसद मनोज झा कहलनि, “लोकतंत्रक हत्या भेल अछि। आब लोकतंत्रकेँ पुनर्जीवित करबाक अछि। जखन ओ (प्रधानमंत्री मोदी) विदेश जाइत छथि तखन छाती ठोकि कहैत छथि जे हम ‘लोकतंत्रक जननी’सँ आयल छी, आब की छाती पीटताह पीएम साहब ?”

 

कांग्रेसक राज्यसभा सांसद सैयद नसीर हुसैन कहलनि, “संसद निर्णय लेबयवला सर्वोच्च निकाय अछि, ७०० सँ बेसी सांसद प्रत्यक्ष वा अप्रत्यक्ष रूपसँ चुनल जाइत छथि।सरकारकेँ सांसदसभकेँ निलम्बित करबाक आ सदन चलयबाक कोनो अधिकार नहिं अछि। ई सरकार पूर्णतः तानाशाही आ अलोकतांत्रिक अछि।”

कांग्रेस सांसद दिग्विजय सिंह कहलनि, “की एतेक सांसदकेँ कहियो निलंबित कयल गेल अछि ? हम केवल गृह मंत्रीसँ बयानक मांग केलहुं।”

माकपा नेता सीताराम येचुरी सरकार पर प्रहार करैत कहलनि, “हमरासभकेँ लोकतंत्रकेँ ओहि लोकसँ बचयबाक आवश्यकता अछि जे एखन सत्तामे छथि। संसदमे सुरक्षा उल्लंघनक लेल भाजपाकेँ जवाबदेह बनयबाक चाही।”

सांसदक सामूहिक निलम्बनक विरुद्ध इंडिया गठबन्धनक विरोध पर कांग्रेस सांसद शशि थरूर कहलनि, “दुनियामे लोकतंत्रक इतिहासमे १४६ सांसदकेँ कहियो निलम्बित नहिं कयल गेल अछि। लोककेँ पता हेबाक चाही जे लोकतंत्र खतरामे अछि। लोकक कहब छनि जे, जे किछु भऽ रहल अछि ओ देशक भविष्यक लेल गलत अछि। एकर एकमात्र उपाय ई अछि जे जनता एहि सरकारकेँ बदलि इंडिया गठबन्धनकेँ सत्तामे आनय।”

 

जनतब दी जे एखनि तक लोकसभा आ राज्यसभा दुनू मिलाकय १४६ टा सांसदक निलंबन भऽ चुकल अछि।