संसदीय मामिला केर मंत्री किरेन रिजिजू शुक्रदिन ऑपरेशन सिन्दूरकेँ लऽ कय संसदमे जारी हंगामा पर एकटा पैघ बयान देलनि। ओ कहलनि जे संसदमे चर्चाक दौरान सरकारक दिसिसँ के बाजत ? विपक्ष एहि बातक निर्णय नहि कय सकैत अछि आ विपक्षक दिसिसँ के बाजत ? सरकार एहि बातक फैसला नहि कय सकैत अछि।
मीडियासँ गप करैत किरेन रिजिजू कहलनि जे सब मुद्दा पर एक संग चर्चा नहि भऽ सकैत अछि। विपक्ष बिहारमे विशेष गहन समीक्षा (एसआईआर) अभियान आओर दोसर कतेको मुद्दा उठेलक अछि। हम हुनका सबकेँ कहलियैन जे पहिने ऑपरेशन सिंदूर पर चर्चा होयत। एकर बाद हम सब निर्णय लेब जे कोन मुद्दा पर चर्चा होयत। ऑपरेशन सिन्दूर पर सोमदिन (28 जुलाई) लोकसभामे 16 घंटा आ मंगलदिन (29 जुलाई) राज्यसभामे 16 घंटा बहस होएत।
विपक्षकेँ निशाना बना कय ओ कहलनि जे संसदक मानसून सत्रक पहिल सप्ताह केहन रहल अहां सब देखलहुं। संसद केर सत्र शुरू होबयसँ पहिने कांग्रेस सहित बहुत दल आग्रह कयने छल कि पहलगाम आतंकी हमला आ ऑपरेशन सिंदूर पर चर्चा होय। सरकार साफ कहलक जे हम सब चर्चा लेल तैयार छी, मुदा विपक्ष पहिल दिनसँ हंगामा मचाबय लागल। विपक्ष संसदक भीतर आ बाहर पोस्टर बैनर लऽ कय विरोध कयलक आ संसदकेँ काज नहि करय देलक। कांग्रेस आओर किछू दल संसदक कार्यवाहीमे बाधा पहुंचा देलक।
किरेन रिजिजू कहलनि जे, सरकार निर्णय लेलक अछि जे सोमदिनसँ पहलगाम आतंकी हमला आ ऑपरेशन सिंदूर पर चर्चा करब। सोमदिनसँ संसद सुचारू रूपसँ काज करत से सब दल स्वीकार कय लेलक अछि। ओ कहलनि जे, प्रत्येक प्रश्नक उत्तर तैयार करबामे बहुत समय लगैत अछि। एहेन स्थितिमे जँ उत्तर नहि सुनल जायत अछि तखन लोककेँ बहुत कष्ट होइत छै। सब मुद्दा पर एक संग चर्चा नहि भ सकैत अछि।
ओ कहलनि जे, लोकसभामे कांग्रेसक राष्ट्रीय अध्यक्ष मल्लिकार्जुन खड़गे आ नेता विपक्षी राहुल गांधीसँ भेंट कयलनि। एहि दौरान की चर्चा भेल ? ई जानकारी सार्वजनिक नहि कएल जा सकैत अछि। सभ दलकेँ संसदमे बाजय केर पर्याप्त मौका भेटत। किरेन रिजिजू कहलनि जे, सरकार न्यायमूर्ति यशवंत वर्मा पर प्रयासरत अछि। सरकार आ विपक्ष एकजुट भऽ मोशन आनत।
