सुप्रीम कोर्ट राजस्थानक उदयपुरमे कन्हैयालाल हत्याक मामिला पर आधारित फिल्म ‘उदयपुर फाइल्स’ केर रिलीज पर रोककेँ कायम रखने अछि। एकर अलावा सूचना आ प्रसारण मंत्रालय केर पांच सदस्यीय जांच समिति फिल्ममे छह बदलावक सुझाव देलक अछि। सुप्रीम कोर्ट केंद्र सरकारकेँ एहि सुझावक प्रति याचिकाकर्ताकेँ सौंपबाक आ अगिला सुनवाई 24 जुलाईकेँ करबाक निर्देश देलक अछि, ता धरि फिल्मक रिलीज पर रोक जारी रहत।
दिल्ली हाईकोर्टक आदेश पर गठित जांच समिति फिल्मके डिस्क्लेमरमे बदलाव, वॉयस ओवर जोड़ब आ किछु क्रेडिट फ्रेम हटाबय केर सलाह देलक अछ। एकर अलावा सऊदी अरबमे इस्तेमाल कयल जाय वला पगड़ी केर एआई-जनरेटेड सीनक बदलैक सुझाव देल गेल अछि, नुपुर शर्मा केर प्रतीकात्मक नाम ‘नुतन शर्मा’ केर हटा नव नामक प्रयोग कय हुनक संवाद “मैने तो वही कहा है जो उनके धर्म संस्कृतिमे लिखा है” केर हटाबैक सुझाव देल गेल छै। एकर संग-संग बलूची समुदायसँ जुड़ल तीन संवादकेँ सेहो हटाबय लेल कहल गेल अछि।
सॉलिसिटर जनरल तुषार मेहता सुप्रीम कोर्टमे कहलनि जे केंद्र सरकार एहि सुझावक संग आदेश जारी कयलक अछि। न्यायमूर्ति सूर्यकांत आ न्यायमूर्ति जॉयमाल्या बागची केर पीठ सुनवाईक दौरान कहलक जे केंद्रक फैसलाक प्रतिलिपि देखलाक बाद अगिला सुनवाईमे एहि मामिला पर विचार करब।
‘उदयपुर फाइल्स’ 2022 मे उदयपुर केर दर्जी कन्हैयालाल साहू केर हत्या पर आधारित अछि, एही फिल्मकेँ केंद्रीय फिल्म प्रमाणीकरण बोर्ड (सीबीएफसी) 50 सँ बेसी कटौतीक साथ मंजूरी दऽ देने छल, मुदा याचिकाकर्ताक कहब अछि कि ई सांप्रदायिक तनाव पैदा कय सकैत अछि। सुप्रीम कोर्ट सब पक्षकेँ सुनवाईक बाद अगिला तारीख तय कयलक अछि। ई फिल्म 11 जुलाईकेँ देशभरिकेँ सिनेमाघरमे रिलीज होबय वला छल। जमीयत उलेमा-ए-हिंद याचिका दायर कय दावा कयलक कि फिल्म केर सामग्रीसँ साम्प्रदायिक तनाव पैदा भऽ सकैत अछि।
