भारतीय निर्वाचन आयोग लोकसभामे नेता प्रतिपक्ष राहुल गांधी द्वारा महाराष्ट्र विधानसभा चुनावक संबंधमे कहल गेल एक-एकटा दावाकेँ “आधारहीन” आ “अनुचित” कहैत बिंदुवार जवाब देलक आ वास्तविक तथ्यकेँ सामने रखलक।
राहुल गांधी अमेरिकामे एकटा कार्यक्रममे आरोप लगौलनि कि चुनाव आयोग निष्पक्षता संग समझौता कयलक। ओ अपन दावाकेँ समर्थनमे महाराष्ट्र विधानसभा चुनावक उदाहरण देलनि। ओतय मतदानक आखिरी दु घंटामे 65 लाख वोट डालल जाएबा पर चुनाव आयोगक “तर्क” पर सवाल उठौलनि आ एकरा “असंभव” बतौलनि।
चुनाव आयोग मंगलदिन एकटा बयानमे कांग्रेस सांसद केर दावाकेँ खारिज करबाक लेल महाराष्ट्र चुनावसँ जुड़ल तथ्य आ डेटा साझा कएलक। आयोग कहलक जे महाराष्ट्र विधानसभा चुनावक दौरान भोर 7 सँ साँझ 6 बजे धरि कुल 6,40,87,588 मतदाता मतदान केन्द्र पहुँचलाह आ अपन वोट डाललाह। औसतन प्रति घंटा लगभग 58 लाख वोट डलल गेल। ई औसत रुझानक अनुसार अन्तिम दू घंटामे लगभग 116 लाख मतदाता वोट डालब संभव छल। निर्वाचन आयोग कहलक जे एकर अलावा उम्मीदवार/राजनीतिक दल द्वारा औपचारिक रूपसँ नियुक्त मतदान एजेंटक सभक सोंझा मतदान भऽ रहल छल। कांग्रेसक नामित उम्मीदवार की हुनक अधिकृत एजेंट सभ अगिला दिन रिटर्निंग ऑफिसर (आरओ) आ चुनाव पर्यवेक्षणक समक्ष जाँचक समय कोनो असामान्य मतदानक संबंधमे कियो पुख्ता आरोप नहि लगेलाह।
मतदाता सूचीमे बहुत संख्यामे नाम जोड़बाक आरोप पर चुनाव आयोग कहलक जे महाराष्ट्र सहित देशक मतदाता सूची जनप्रतिनिधित्व अधिनियम, 1950 आ मतदाता पंजीकरण नियम, 1960क अनुसार तैयार कएल गेल अछि। नियमक अनुसार, या तँ चुनावसँ ठीक पहिने वा हर साल एक बेर, मतदाता सूचीक विशेष सारांश संशोधन कयल जाइत अछि आ मतदाता सूचीक अंतिम प्रति भारतीय राष्ट्रीय कांग्रेस सहित सभ राष्ट्रीय/राज्य राजनीतिक दल सभकेँ सौंपल जाइत अछि। आयोग कहलक जे महाराष्ट्र चुनावक दौरान मतदाता सूचीकेँ अंतिम रूप देबाक बाद, 9,77,90,752 मतदाताक मुकाबिला, प्रथम अपीलीय प्राधिकरण (डीएम) केँ समक्ष केवल 89 अपील दर्ज कयल गेल आ द्वितीय अपीलीय प्राधिकरण (सीईओ) केँ समक्ष केवल एकटा अपील दर्ज कयल गेल। आयोग कहलक जे महाराष्ट्र विधानसभा चुनाव, 2024 सँ पहिने कांग्रेस वा कियो आंतरिक राजनीतिक दलक तरफसँ कोनो शिकायत नहि छल। चुनाव आयोग इहो कहलक जे ओ 24 दिसंबर 2024 केँ कांग्रेसकेँ देल अपन उत्तरमे एहि सभ तथ्य सभकेँ सामने रखने छल, जे चुनाव आयोगक वेबसाइट पर उपलब्ध अछि। एहेन लगैत अछि जे एहेन मुद्दा सभकेँ बारंबार उठा एहि सभ तथ्य सभकेँ सभ तरहसँ नजरअंदाज कयल जा रहल अछि।
आयोग एकटा बयानमे कहलक, “मतदाता सूचीक पुनरीक्षण केर दौरान, 1,00,427 मतदान केन्द्र सभक लेल ईआरओ द्वारा नियुक्त 97,325 बूथ स्तर केर अधिकारी संगहि समस्त राजनीतिक दल द्वारा 1,03,727 बूथ स्तर केर एजेंट सभ सेहो नियुक्त कयल गेल छल, जाहिमे कांग्रेस द्वारा 27,099 एजेंट नियुक्त कयल गेल छल। तें, महाराष्ट्र केर मतदाता सूचीक विरुद्ध उठायल गेल ई निराधार आरोप कानून आ शासनक अपमान अछि।”
आयोग झूठ सूचना पसारय लेल कांग्रेस पार्टीक आलोचना कयलक अछि आ एकरा कानूनक शासनकेँ अपमान बतौलक अछि। आयोग कहलक, ‘ककरो द्वारा पसारल जा रहल कोनो झूठ सूचना मात्र कानूनक प्रति अनादरक संकेत नहि अछि, बल्कि राजनीतिक दल द्वारा नियुक्त हजारों प्रतिनिधिकेँ सेहो बदनाम करैत अछि आ लाखों चुनाव कर्मचारीकेँ हतोत्साहित करैत अछि, जे चुनावक दौरान अथक आ पारदर्शी तरिकासँ काज करैत छथि।
राहुल गांधीक चुनाव आयोगक निष्पक्षतासँ समझौता वला टिप्पणी पर कड़ा आपत्ति जतबैत आयोग कहलक जे एहेन टिप्पणीक उद्देश्य चुनाव आयोगकेँ बदनाम करब अछि, जे पूर्णरूपेण बेतुका अछि।
