भारत अन्तर्राष्ट्रीय विज्ञान महोत्सव (आई.आई.एस.एफ.) केर १०म संस्करण शनिदिन आई.आई.टी. गुवाहाटीमे प्रारम्भ भेल आ ४ दिसम्बर धरि चलत। एहि सालक विषय अछि “भारतकेँ विज्ञान आ प्रौद्योगिकी आधारित वैश्विक मैन्युफैक्चरिंग हबमे बदलब”। ई महोत्सव भारतक वैज्ञानिक उपलब्धिकेँ प्रदर्शित करैत अछि, सहयोगकेँ बढ़ावा दैत अछि, आ युवा मनकेँ नवाचार करबाक लेल प्रेरित करैत अछि।
एहि सालक महोत्सवक नेतृत्व वैज्ञानिक आ औद्योगिक अनुसंधान परिषद (सी.एस.आई.आर.) कऽ रहल अछि, जकर समन्वय राष्ट्रीय अन्तरविभागीय विज्ञान आ प्रौद्योगिकी संस्थान (सी.एस.आई.आर.-एन.आई.आई.एस.टी.) द्वारा कयल जा रहल अछि। आई.आई.एस.एफ.क शुरुआत २०१५ मे कयल गेल छल, आ ई समाजकेँ विज्ञानसँ जोड़बाक लेल एकटा अद्वितीय मंच अछि, जे पेशेवर आ आम जनता दुनू लेल गतिविधि प्रदान करैत अछि। ई पहिल बेर अछि जखनि ई महोत्सव भारतक पूर्वोत्तर क्षेत्रमे आयोजित कयल जा रहल अछि।
महोत्सवक प्रमुख आकर्षणमे “चन्द्रयान – म्यूजियम ऑफ द मून” सम्मिलित अछि, जे भारतक चन्द्रयान-३ केर सफलताक उत्सव मनावयवला एकटा कलात्मक चन्द्र मॉडल अछि। एकर अतिरिक्त, एकटा विशाल विज्ञान आ प्रौद्योगिकी प्रदर्शनी सेहो स्थापित कयल गेल अछि, जाहिमे एसटीईएम (विज्ञान, प्रौद्योगिकी, अभियांत्रिकी आ गणित) क्षेत्रमे अत्याधुनिक नवाचारकेँ प्रदर्शित कयल गेल अछि। अन्य प्रमुख आयोजनमे “मेक इन इंडिया, मेक फॉर द वर्ल्ड” फोरम, महिला वैज्ञानिकसभक लेल “वुमन इन एसटीईएम” काॅन्क्लेव, स्टार्ट-अप शोकेस, आ पूर्वोत्तर सांस्कृतिक महोत्सव शामिल अछि, जे एहि क्षेत्रक परम्परा आ विरासतकेँ उजागर करैत अछि।
महोत्सवक आयोजन विज्ञान आ प्रौद्योगिकी मंत्रालय, विज्ञान भारती आ विभिन्न सरकारी आ निजी संस्थानक सहयोगसँ कयल गेल अछि। सहभागिता पूर्ण रूपसँ निःशुल्क अछि, जाहिसँ आम जनता भारतक वैज्ञानिक उपलब्धि आ नवाचारसँ जुड़ि सकैत अछि। बेसी जानकारीक लेल www.iisf2024.in पर जा सकैत छी।
