महाराष्ट्रक अगिला मुख्यमंत्री के होयत एहि पर एखनो भ्रम अछि। किएक त, एखन धरि नहिं तऽ भाजपा विधायक दलक बैसार भेल अछि आ ने महायुति बैसार।
महाराष्ट्र विधानसभा चुनावक परिणाम २३ नवम्बरकेँ घोषित कयल गेल आ विधानसभाक कार्यकाल २६ नवम्बरकेँ समाप्त भऽ गेल। मुदा, महाराष्ट्रक अगिला मुख्यमंत्री के होयत एहि बारेमे एखन धरि चित्र स्पष्ट नहि अछि। मुदा, हालहिमे कार्यवाहक मुख्यमंत्री एकनाथ शिंदे कहने छलाह जे ओ भाजपाक मुख्यमंत्रीकेँ सेहो स्वीकार करताह। महायुति आ भाजपाक शीर्ष नेतृत्व जे निर्णय लेत, हम ओकर समर्थन करब।
एकनाथ शिंदेक बयानक बाद देवेंद्र फडणवीस महाराष्ट्रक अगिला मुख्यमंत्री होयबाक कयास लागय लागल। एहेनमे एकनाथ शिंदे केर भूमिका पर सेहो सवाल उठत। की ओ महाराष्ट्रमे उपमुख्यमंत्रीक रूपमे काज करबाक लेल तैयार होयताह, वा ओ मंत्रिमण्डलमे शामिल होयताह ?
देवेंद्र फडणवीस, एकनाथ शिंदे आ अजित पवार बृहस्पतिकेँ केंद्रीय गृहमंत्री अमित शाहक निवास पर भेंट कयलनि। एहि बैसारक बाद अटकलबाजी शुरू भेल जे महायुतिमे सब किछु ठीक अछि आ शुक्रदिन महायुतिक बैसारमे मुख्यमंत्रीक नामक घोषणा कयल जायत। मुदा, जखनि कार्यवाहक मुख्यमंत्री एकनाथ शिंदे अचानक अपन गाम सतारा लेल रवाना भेलाह तखनि बैसार स्थगित करय पड़ल।
कहल जा रहल अछि जे एकनाथ शिंदेकेँ केंद्र सँ केंद्रीय मंत्री बनेबाक प्रस्ताव सेहो देल गेल अछि। एकर अलावा उप मुख्यमंत्री पदक प्रस्ताव सेहो देल गेल अछि। जँ एकनाथ शिंदे केन्द्रीय मंत्री बनबाक लेल राजी भऽ जाइत छथि तखनि हुनक गुटक कोनो व्यक्तिकेँ उपमुख्यमंत्री बनाओल जा सकैत अछि।
मानल जा रहल अछि जे आब महाराष्ट्रमे भाजपा विधायक दलक बैसार १ दिसम्बरकेँ मुख्यमंत्रीक चेहरा पर निर्णय लेबाक लेल आयोजित कयल जा सकैत अछि। एहि दौरान दूटा पर्यवेक्षकक उपस्थितिमे मुख्यमंत्रीक नामक घोषणा कयल जा सकैत अछि।
