मिथिलाक्षर साक्षरता अभियानक ग्यारहम स्थापना दिवस पाक्षिक समारोहक तेरहम दिन यानि ७ अक्टूबर केँ रातुक कार्यक्रमक मुख्य आकर्षण रहलैथ चर्चित कलाकार संगम झा। दिन प्रतिदिन प्रोग्रामक ग्राफ सफलताक दृष्टिकोणसॅं उपर उठि रहल अछि। संगम झा गोसाउनीक गीत ‘जय जय भैरव’सॅं शुरुआत कयलनि आ पश्चात एक पर एक भगवती गीत, लोक गीत, भोला बाबाक नाचारी, आदि एक पर एक झमकौआ प्रस्तुती दय श्रोताकेँ बान्हि कऽ रखने रहलथि।
मां शारदे हुनक कंठमे विराजमान छथिन। बहुत उच्चीकोटिक गायकी रहल।
ओही केर बाद आभियिनी लोकनि संगीता, अंजू झा, शितांजली, राधा कुमारी, ममता झा, सुधीर यादव, इन्द्र देव चौधरी आदि आबि भगवती गीत आ लोक गीत प्रस्तुत कयलैन। सब गोटें एक पर एक गाबि श्रोतागणकेँ मंत्र मुग्ध कयलैन।
पुनः प्रतिदिनक भांति शामिल भेलाह सदाबहार चर्चित कलाकार जे एखन धरि प्रायः सब दिन अपन प्रस्तुति दैत एलाह दिलीप कुमार मंडल। ओ आबिते अभियानक संरक्षक देवेन्द्र झा लिखल भगवती गीत “माय गे हमरो टेहलुक बनाले, करबो तोहर सबटा काज गे’, संग अपन प्रस्तुत कयलैन।तदुपरान्त एक पर एक भगवती गीत, लोक गीत ‘मामा यौ कनि खैनी दिए’, ‘दुमकामे झूमका हरौलनि’, ‘मिथिलाक जलसॅं भरव गगरी’, ‘सिनेहिया विसरि बैसल अछि गाम’ गाबि सबकें मंत्रमुग्ध कयलैनि।
इन्द्र देव चौधरी भोला बाबाक नाचारी संग प्रोग्रामक समापन कयलैन। प्रसंशाक पात्र अभियानक वरिष्ठ संरक्षक शंभू नाथ झा जे सब दिन एक पर एक चर्चित कलाकार सभकेँ अहिठाम आमंत्रित कय बजबैत छथि।
प्रोग्रामक संचालक देवेन्द्र झा कहलनि समय केर अभाव खलि रहल अछि। समयाभावमे सब गोटेंकेँ पूरा समय नहिं दs पाबि रहल छी।
सब दिनक भांति वरिष्ठ संरिक्षका रूणू मिश्रा आ संरक्षक नवीन झा प्रोग्रामक व्यवस्थामे अपन सराहनीय योगदान देलैन।
टेक्निकल विभाग दीपक आनंद मल्लिक आ संजय मिश्रा बहुत सुंदर ढंगसॅं निभाबैत आबि रहल छथि।
