नाइजीरियामे पेट्रोल टैंकर विस्फोटमे ९० सँ बेसी लोकक मृत्यु, ५० घायल

नई दिल्ली
*

नाइजीरियाक जिगावा राज्यमे मंगलदिन राति पेट्रोल टैंकर विस्फोटमे ९० सँ बेसी लोकक मृत्यु भऽ गेल आ ५० गोटे घायल भऽ गेलाह। ई दुर्घटना माजिया कस्बामे भेल छल, जतय टैंकर चालकक नियंत्रण खतम भऽ गेल आ खादीजा विश्वविद्यालयक समीप टैंकरमे विस्फोट भऽ गेल। जिगावा पुलिसक प्रवक्ता शी’इसु आदम बुधदिन एहि घटनाक पुष्टि कयलनि आ कहलनि जे ९४ लोकक मृत्यु भऽ गेल आ घायलसभकेँ रिंगिम जनरल अस्पताल लऽ जायल गेल, जतय हुनकर इलाज चलि रहल अछि।

ओ कहलनि, “ई दुर्घटना मंगलदिन राति लगभग ११:३० बजे माजिया शहरमे भेल जखन चालक कानोसँ न्गुरु, योबे जा रहल छल। दुर्भाग्यवश, टैंकर पलटैते विस्फोट भऽ गेल। आदम इहो कहलनि जे पुलिस द्वारा बेर-बेर चेतौनी देलाक बादो एहेन घटनाक बाद लोक दुर्घटना स्थल पर जमा भऽ जाइत अछि, जाहिसँ भारी क्षति होइत अछि। एहि बेर सेहो वैऽह भेल छल, जाहि कारणेँ एतेक लोक विस्फोटक चपेटमे आबि गेल।
प्रवक्ता जनतब देलनि जे पीड़ित सभक सामुहिक अंतिम संस्कार बुधकेँ भोर ०९ बजे भेल।