आयकर विभाग अनुसार २८ फरवरी धरि वित्तीय वर्ष २०२४-२५ लेल ९ करोड़सँ बेसी लोक अपन आयकर रिटर्न (आईटीआर) दाखिल कऽ चुकल छथि। विभागक आंकड़ाक अनुसार ४.६८ लाख करदाता १ करोड़ टाकासँ बेसी आमदनी घोषित कयने छथि।
आँकड़ा संकेत दैत अछि जे ३.८९ लाख लोकक आय १ करोड़सँ ५ करोड़ टाकाक बीच छल, जखनि कि ३६,२७४ करदाता ५ करोड़सँ १० करोड़ टाकाक बीच आय घोषित कयलनि। एकर अतिरिक्त, ४३,००४ लोकक आय १० करोड़ टाकासँ बेसी छल।
एखन धरि देश भरिमे ९.११ करोड़ करदाता आईटीआर दाखिल कऽ चुकल छथि, जे कुल १३.९६ करोड़ पंजीकृत करदाताक लगभग ६५ प्रतिशत अछि। आयकर विभाग कहलक अछि जे ८.५६ करोड़ आईटीआर ई-सत्यापित कयल गेल अछि आ ३.९२ लाख करोड़ टाकाक कर रिफंड सेहो जारी कयल गेल अछि।
राज्यक मामिलामे महाराष्ट्रमे सबसँ बेसी १.३८ करोड़ आईटीआर दाखिल कयल गेल अछि। उत्तर प्रदेशमे ९०.६८ लाख आ गुजरातमे ८७.९० लाख लोक रिटर्न दाखिल कयने छथि। दिल्लीमे ४४.४५ लाख लोक आईटीआर दाखिल कयलक अछि, जखन कि आंध्र प्रदेशमे ३०.७६ लाख आ पंजाबमे ४३.७९ लाख रिटर्न दाखिल कयल गेल अछि।
आयकर विभाग आशा व्यक्त कयलक अछि जे ३१ मार्च २०२५ (समयसीमा) धरि आईटीआर दाखिल करयवलाक संख्या आओर बढ़ि जायत। एहिसँ पहिने, विभाग बतौलक जे चालू वित्तीय वर्षक दौरान (१ अप्रैल २०२४ सँ १६ मार्च २०२५ धरि) प्रत्यक्ष कर संग्रह १६.२% बढ़ि कऽ २५.८६ लाख करोड़ रुपया भऽ गेल अछि जे पछिला वित्तीय वर्षक एहि अवधिसँ बेसी अछि।
