बिहारमे स्वास्थ्य सेवा आ व्यवस्था पर रोज सवाल उठैत अछि। हालमे एकटा मामिला समस्तीपुर जिलासँ स्वास्थ्य विभागक अछि, सोमक राति (19 मई 2025) सतर्कता टीम एकटा भ्रष्ट स्वास्थ्य प्रबंधककेँ गिरफ्तार कयलक अछि।
सदर अस्पतालमे स्वास्थ्य प्रबंधकक रूपमे काज करय वाला डॉ. रामानंद विश्वजीत चारि हजार रुपयाक घूस लैत पकड़ल गेलाह, एहि घटनासँ स्वास्थ्य विभागमे हड़कंप मचि गेल। सदर अस्पतालमे सतर्कता टीम डॉ. रामानंदकेँ रंगल हाथ पकड़ि लेलक। गिरफ्तारीक बाद तुरंत पुलिस हिरासतमे लs कs पटना पठा देल गेल।
प्राप्त जानकारीक अनुसार भ्रष्टाचारक मामिला तखनि सामने आयल जखनि अस्पतालक शव वाहन चालक जयराम सिंह स्वास्थ्य प्रबंधकक खिलाफ सतर्कता विभागमे शिकायत दर्ज करौलनि। जयराम कहलनि जे, ओ रोज 301 रुपैया कमाइत छथि, मुदा वेतन वितरणक दौरान डॉ. रामानंद हुनकासँ 1500 रुपैया कमीशन मांगैत छथि। जयराम आगू कहलनि जे, तीन मासक बकाया वेतन पाबय लेल हुनकासँ 6000 रुपैयाक घूस मांगल गेल छल। 2000 रुपैया घूस देलाक बादो बकाया नहि भेटल। जकर बाद ओ सतर्कता अधिकारीकेँ लिखित शिकायत दर्ज करौलनि।
रविकेँ जखनि चारि हजार टकाक अतिरिक्त मांग कयल गेल, तखनि सतर्कता टीम डॉ. रामानंदकेँ गिरफ्तार करबाक योजना बनौलक। जयराम द्वारा घूसक राशि सौंपैत देरी मौका पर मौजूद सतर्कता टीम तुरंत धऽ लेलक आ बंदी बना लेलक।
