ईरान काल्हि 6 परमाणु वैज्ञानिकक मृत्युकेँ स्वीकार कय लेलक। एहिमे ईरान’क परमाणु ऊर्जा संगठनक पूर्व प्रमुख डॉ. फेरेदून अब्बासी, प्रमुख परमाणु भौतिक विज्ञानी डॉ. मोहम्मद मेहदी तेहरांची, अब्दुलहमीद मिनोचेहर, अहमदरेजा ज़ोलफाघरी, सईद अमीरहुसैन फेकी आ मोतालाबिजादेह छलथि।
इजरायली हमलामे देशक टॉप लीडरशिपक नुकसान केर बाद ईरान आक्रोशित अछि। ईरानी मीडियाक अनुसार ईरान केर रक्षा मंत्री अजीज नासिरजादे कहलनि, इजरायलकेँ हमर ‘थकूचि देबयवला प्रतिक्रियाक’ इंतजार करबाक चाहि। संयुक्त राष्ट्रकेँ भेजल गेल एगो चिट्ठीमे ईरान एही हमलाक बाद संयुक्त राष्ट्र सुरक्षा परिषदकेँ तुरंत बैसार करय केर मांग कयने अछि। तेहरान इजरायली हमलाक कड़ा निंदा कयलक आ सुरक्षा परिषदसँ ईरानी संप्रभुताक उल्लंघनसँ पैदा होबयवला सवालकेँ उठाबय लेल तत्काल बैसार बजाबय केर मांग कयलनि। संयुक्त राष्ट्रकेँ भेजल गेल एही पत्रमे ईरान लिखने अछि, ईरान’क इस्लामिक गणराज्य एही कायर आ गैरकानूनी काजक जवाब अपन पसंदक समय आ स्थान पर निर्णायक, आनुपातिक आ निवारक तरीकासँ देत।
एहि पत्रमे आगू लिखल (कहल) गेल छै कि ईरानकेँ क्षेत्रीय अखंडता, राष्ट्रीय सुरक्षा आ नागरिकक रक्षा करबाक एकटा मौलिक आ नॉन नेगोशिएबल (समझौता योग्य नहि) अधिकार अछि। ईरान’क विदेश मंत्री अब्बास अरघची संयुक्त राष्ट्रकेँ चिट्ठी लिखी कहलनि, इजरायल केर आक्रामकता एगो ‘‘युद्धक घोषणा’ अछि। अरघची एही चिट्ठीमे आईएईए केर प्रमुख ग्रोसीसँ आग्रह कयलनि, ईरानक परमाणु स्थल पर इजरायली हमलाक निंदा कयल जाय ।
ईरान कहलक, ज़ायोनी शासनकेँ एही आक्रामकता आ ओकर रणनीतिक गलत गणनाकेँ भारी कीमत चुकाबै पड़त। इजरायल’क एहि अभूतपूर्व हमलामे ईरान’क शीर्ष सैन्य नेतृत्वक सफाया भऽ गेल अछि। एकर परमाणु स्थल नष्ट भऽ गेल अछि आ एकर बैलिस्टिक मिसाइल कार्यक्रम सेहो क्षतिग्रस्त भऽ गेल अछि। ईरान स्वीकार कयलक कि ईरानी सशस्त्र सेना केर चीफ ऑफ स्टाफ मेजर जनरल मोहम्मद बघेरी, इस्लामिक रिवोल्यूशन गार्ड कोर (आईआरजीसी) केर कमांडर मेजर जनरल हुसैन सलामी, अल अनबिया केंद्रीय मुख्यालय केर कमांडर मेजर जनरल गुलाम अली रशीद केर एही हमलामे मृत्यु भऽ गेल।
ईरान’क सर्वोच्च धार्मिक नेता अली खामेनी एहि हमलाक बाद आक्रोशित छथि। ओ इजरायलकेँ सजा देबाक धमकी देने छथि। अली खामेनी कहलनि, “जायोनिस्ट शासनकेँ कठोर सजाक उम्मीद करबाक चाही। ईरान’क सशस्त्र सेनाक ताकतवर हाथ ओकरा बिना सजा देने नहि छोड़त। एहि हमलामे हमर बहुत कमांडर आ वैज्ञानिक शहीद भऽ गेल, मुदा हुनकर उत्तराधिकारी अपन मिशन जारी राखत । ई अपराध कय ज़ायोनिस्ट शासन अपन कटु भाग्य पर मुहर लगा देलक आ आब एकर कीमत ओकरा चुकाबै पड़तै।” ईरान’क इहो कहब अछि, एही हमलामे बहुत निर्दोष नागरिक, बच्चा आ महिलाक मृत्यु भेल अछि।
