जनसरोकार 6 एयरपोर्टक होयत सर्वेक्षण, जेपी आंदोलनक बंदीक पेंशन बढ़ल, 30 एजेंडा नीतीश मंत्रिमंडलसँ पारित August 14, 2025 Maithil Punarjagran Prakash पटना समदिया * बिहार विधानमंडलक सदस्यक वेतन भत्ता आ पेंशन नियममे सेहो संशोधनक मंजूरी भेटि गेल अछि। आब विधायक आ विधान पार्षदक वेतन भत्ता आओर पेंशन बढ़त। मुख्यमंत्री नीतीश कुमारक अध्यक्षतामे बुधदिन (13 अगस्त 2025) मंत्रिमंडलक बैसार भेल। एहि दौरान 30टा एजेंडाकेँ मंजूरी देल गेल। मंत्रिमंडलमे निर्णय भेल जे जेपी आन्दोलनमे जे आन्दोलनकारी जेलमे छलाह हुनका आब दुगुना पेंशन भेटतनि। पहिने एक माससँ 6 मास धरि जेलमे रहनिहारकेँ ७५० रूपया भेटैत छल। आब एकरा बढ़ा कए 15 हजार रूपया कऽ देल गेल अछि। संगहि 6 महीनासँ बेसी जेलमे रहल लोकक पेंशन राशि 15 हजासँ बढ़ा कए 30 हजार रूपया कय देल गेल अछि। एकर संग-संग बिहार विधानमंडलक सदस्यक वेतन भत्ता आ पेंशन नियममे संशोधनक मंजूरी देल गेल अछि। आब विधायक आ एमएलसीक वेतन भत्ता आओर पेंशन बढ़त। दोसर दिसि चिरैयातांड फ्लाईओवरकेँ बरबिगहा होइत पटनाक मिठापुर फ्लाईओवरसँ जोड़ल जाएत। कैबिनेट मंगलकेँ एहि फ्लाईओवरक निर्माण लेल 292 करोड़ 74 लाख 4000 रूपयाक मंजूरी देलक अछि। पटनाक पुनपुनमे लक्ष्मण झूलाक समानांतर झूला पुलक निर्माण होएत। कैबिनेट एहि लेल काल्हि 92 करोड़ 99 लाख 48 रूपयाक मंजूरी देलक अछि। दोसर दिसि ग्रीनफील्डक छहटा हवाई अड्डाक सर्वेक्षण होएत। एहिमे वीरपुर (सुपौल), मुंगेर, मुजफ्फरपुर, सहरसा, वाल्मीकि नगर (पश्चिम चंपारण) आ भागलपुर शामिल अछि। मंत्रिमंडल एहि सर्वेक्षण लेल 2 करोड़ 90 लाख 51 हजार 720 रुपयाक मंजूरी दऽ देलक अछि। Spread the love
