लोकसभामे विपक्षक नेता राहुल गाँधी, एनसीपी (सपा) सांसद सुप्रिया सुले आ शिवसेना सांसद संजय राउत महाराष्ट्र विधानसभा चुनावक सम्बन्धमे नई दिल्लीक कॉन्स्टीट्यूशन क्लबमे एकटा संवाददाता सम्मेलन कयलनि। एहि दौरान ओ महाराष्ट्रमे नव मतदाताक संख्या पर सवाल उठौलनि।
लोकसभामे विपक्षक नेता राहुल गांधी प्रेस कॉन्फ्रेंसक दौरान कहलनि “हम महाराष्ट्रमे पिछला चुनाव लड़निहार पूरा विपक्षक प्रतिनिधित्व कयलौं आ हम महाराष्ट्र चुनावसँ जुड़ल किछु महत्वपूर्ण तथ्य भारतक जनताक सामने आनय चाहैत छी। हमर टीम मतदाता सूची आ मतदानक पैटर्न केर ध्यानसँ अध्ययन कयलक आ हम किछु समयसँ एहि पर काज कऽ रहल छी, विशेष रूपसँ लोकतंत्रमे विश्वास करयवला युवासभक चिन्ताक विषयमे।
राहुल गांधी कहलनि जे, महाराष्ट्रमे विधानसभा 2019 आ लोकसभा 2024क बीच पांच सालमे 32 लाख नव मतदाता जोड़ल गेल, एकर बाद लोकसभा 2024 आओर महाराष्ट्र विधानसभा 2024क बीच मात्र 5 महीनामे 39 लाख नव मतदाता जोड़ल गेल, सवाल अछि जे पिछला 5 सालक मुकाबला 5 महीनाम कोना बेसी मतदाता जोड़ल गेल?”
ओ आगू कहलनि जे, “ई संख्या हिमाचल प्रदेशक कुल मतदाताक बराबर अछि। दोसर मुद्दा अछि जे राज्यक कुल मतदाता आबादीसँ बेसी मतदाता किएक महाराष्ट्रमे अछि ? कोनो तरहे महाराष्ट्रमे अचानक मतदाताक निर्माण केना भेल ?”
बाबा साहेबक जिक्र करैत कांग्रेस नेता कहलनि जे, संविधानक निर्माणमे मदद करय वाला अम्बेडकर कहने छलाह जे लोकतंत्रमे मतदाता सूची सबसँ बेसिक चीज अछि। चुनाव कोनो तरहक हस्तक्षेपसँ मुक्त होबय होय से आवश्यक अछि। संगहि चुनावी मशीनरी कार्यकारी सरकारक नियंत्रणसँ बाहर होयबाक चाही।
ओ आगू कहलनि जे, “पहिने चुनाव आयुक्तक चयन एकटा समिति द्वारा कयल जाइत छल जाहिमे सीजेआई, विपक्षक नेता आ प्रधानमंत्री शामिल होइत छल। ई सरकार एकरा बदलि देलक, ओ सब सीजेआईकेँ समितिसँ हटा देलक आ ओहिमे भाजपाक व्यक्तिकेँ शामिल कयलक। लोकसभा चुनावसँ ठीक पहिने एकटा ‘निर्वाचन आयुक्त’केँ हटा देल गेल आ दू टा नव आयुक्तक नियुक्ति भेल।”
राहुल गांधी कहलनि जे, हम चुनाव आयोगकेँ कहैत छी जे हमरा सबकेँ विसंगति भेटल अछि, हमरा सबकेँ महाराष्ट्र मतदाताक नाम आ पता वाला मतदाता सूची चाही। संगहि लोकसभा चुनाव आ विधानसभा चुनावक मतदाता सूची चाही, किएक तऽ हम सब ई बुझय चाहैत छी जे ई नव जोड़ल गेल मतदाता के छथि। बहुत रास मतदाता छथि जिनकर नाम डिलीट भऽ गेल अछि, ई मतदाता दलित, आदिवासी आ अल्पसंख्यक समुदायसँ आबैत अछि।
शिवसेनाक (यूबीटी) सदस्य संजय राउत चुनाव आयोग पर सवाल उठौलनि। ओ कहलनि जे राहुल गाँधी देशक सोझाँ बहुत महत्वपूर्ण प्रश्न उठौलनि आ जँ देशक चुनाव आयोगक विवेक जीवित अछि आ मरल नहि अछि तखनि हुनका जवाब देबय पड़त। हम मानैत छी जे चुनाव आयोग सरकारक गुलाम बनि कऽ रहि गेल अछि। ई 39 लाख वोट कतए सँ आयल आ कतए जाएत ? हमरा विश्वास अछि जे ई मतदाता भटकैत रहत आ किछु दिल्ली सेहो आबि जायत। तखनि ओ सभ उत्तर प्रदेश वापिस चलि जायत, एहि तरहेँ सरकार चुनाव लड़ैत अछि आ जीतैत अछि।
तहिना राकांपा नेता सुप्रिया सुले सेहो चुनाव आयोग पर सवाल उठौलनि। ओ कहलनि जे हम सभ ओहि क्षेत्रमे मतपत्र पर फेरसँ चुनाव सेहो चाहैत छी जतय हमर उम्मीदवार जीति गेलाह, पार्टी चिन्ह पर भ्रमक कारण, ११ सीट अछि जतय हम चुनाव हारि गेलहुँ। सत्तामे रहनिहार पार्टी सेहो एकरा स्वीकार कऽ लेने अछि। हम बेर-बेर ‘तुतारी’ चुनाव चिन्ह बदलबाक अनुरोध कयने छी, मुदा हमर अनुरोधपर विचार नहि कयल गेल अछि। हम केवल चुनाव आयोगसँ निष्पक्षताक मांग करैत छी।
