बिहारमे जितिया स्नानक दौरान अलग-अलग दुर्घटनामे ४३ लोकक मृत्यु भऽ गेल। औरंगाबादमे डूबलासँ सबसँ बेसी १० गोटेक मृत्यु भेल अछि। मृतमे अधिकांश बच्चा शामिल अछि। मुख्यमंत्री एहि दुर्घटना पर दुख व्यक्त कयलनि अछि।
जितिया स्नान पर बिहारमे अफरातफरी भेल। स्नानक अवधिमे अलग-अलग जिलामे दुर्घटना भेल, जाहिमे डूबलासँ ४३ लोकक मृत्यु भऽ गेल। मृतमे अधिकांश बच्चा शामिल अछि। सबसँ बेसी मृत्यु औरंगाबाद जिलामे भेल अछि। घटनाक बाद परिवारमे हाहाकार पसरि गेल अछि।
बिहारक मुख्यमंत्री नीतीश कुमार एहि दुर्घटनामे सात बच्चाक मृत्युपर दुख व्यक्त करैत मृतकक परिवारकेँ चार-चारि लाख टाकाक मुआवजा देबाक घोषणा कयलनि।
औरंगाबादमे सबसँ बेसी १० गोटेक मृत्यु भेल अछि। एकर अतिरिक्त छपरामे ५, रोहतासमे ४, कैमूर, सीवान आ मोतिहारीमे ३-३ लोकक मृत्यु भेल। बेतिया आ बेगूसरायमे डूबलासँ दूटा लोकक मृत्यु भऽ गेल। गोपालगंज, भोजपुर, नालंदा, दरभंगा, मधुबनी, समस्तीपुर आ अरवलमे १-१ गोटेक मृत्युक समाचार अछि।
मंगल/बुधकेँ महिला लोकनि उपवास रखलनि आ जितियाक अवसर पर अपन बच्चाक दीर्घायुक लेल प्रार्थना कयलनि। औरंगाबाद जिलामे दूटा पैघ दुर्घटना भेल जाहिमे ८ टा बच्चाक मृत्यु भऽ गेल। एहिमे चारिटा लड़की शामिल अछि। पहिल घटना जिलाक बरुण थाना क्षेत्रमे भेल। एतय महिला आ लड़की सभ पोखरिमे नहाय रहल छलीह। महिला लोकनि स्नान कयलनि आ पूजा करबाक लेल लगक मन्दिर चलि गेलीह। लड़की सभ पोखरिमे स्नान करैत रहलीह।
तखन एकटा लड़की गहिर पानिमे डूबए लागल। जखन ओ चिकरलीह तखन ओकर बहिन ओकरा बचाबय लेल पानिक भीतर चलि गेलीह। ओ सेहो डूबय लगलीह, ई देखि तीनटा आन लड़की सेहो पानिमे कूदि गेल। मुदा ओ सभ सेहो पानिमे गहींर धरि चलि गेल। जखनि लोकसभ हुनका डूबैत देखलनि तखन ओ हुनका बचाबय लेल दौड़लाह। लोकसभ एकटा लड़कीकेँ बचा लेलक मुदा डूबलासँ चारिटा लड़कीक मृत्यु भऽ गेल।
दोसर घटना जिलाक मदनपुर थाना क्षेत्रक कुशामे भेल। एतय १८ गोट बच्चा आहारमे स्नान करैत काल डूबय लागल। बच्चासभक चीख सुनि लगपासक लोक हुनका बचाबय लेल दौड़ल। १४ बच्चाकेँ बचा लेल गेल। मुदा डूबलाक कारण चारिटा बच्चाक मृत्यु भऽ गेल।
राज्यक अलग-अलग जिलामे सेहो एहने घटना भेल। दुर्घटनाक बाद मृतकक परिवारमे हाहाकार पसरि गेल। परिवारक सदस्यक कानि रहल छलथि। हुनकर माता-पिता बच्चाक मृत्युसँ बेहोश छथि। बिहारक मुख्यमंत्री नीतीश कुमार एहि घटना पर दुख व्यक्त कयलनि अछि।
