छत्तीसगढ़मे नक्सल विरोधी अभियानक दौरान सुरक्षा बल आ नक्सलवादीक बीच एकटा पैघ मुठभेड़ भेल अछि। एहीमे एखन धरि ३१ नक्सली मारल जा चुकल अछि, जाहिमे सभटा वर्दीधारी माओवादी छल। मृतक नक्सलीक पहिचान चलि रहल अछि।
नक्सलवादीक खिलाफ बहुत दिनसँ कारवाई चलि रहल अछि। पिछला 40 दिनमे सुरक्षा बल द्वारा 56 नक्सली मारल गेल अछि। बीजापुरक इन्द्रावती राष्ट्रीय उद्यान क्षेत्रमे खोज निरंतर जारी अछि।
पुलिस सूत्रक अनुसार वामपंथी उग्रवादक खिलाफ एकटा पैघ अभियानमे सुरक्षा बल रविदिन छत्तीसगढ़क बीजापुर जिलामे एकटा मुठभेड़क दौरान 31 नक्सलीकेँ मारि देलक। ओ कहलनि जे झड़पमे दूटा सुरक्षाकर्मी सेहो शहीद भऽ गेल आ अन्य किछु घायल भऽ गेलाह।
एहि घटनाक संग एहि साल एखनि धरि राज्यमे अलग-अलग मुठभेड़मे सुरक्षा बल द्वारा 81 नक्सली मारल जा चुकल अछि। बस्तर रेंजक पुलिस महानिरीक्षक सुंदरराज पी बतौलनि जे ताजा मुठभेड़ भोरे इन्द्रावती राष्ट्रीय उद्यान क्षेत्रक एकटा जंगलमे भेल जखनि विभिन्न सुरक्षा बलक कर्मीक एकटा संयुक्त दल नक्सल विरोधी अभियान पर निकलल छल। ओ कहलनि, “मुठभेड़मे एकतीस नक्सली मारल गेल अछि”। अधिकारी कहलनि जे घटनास्थलसँ भारी मात्रामे हथियार आ विस्फोटक सेहो जब्त कयल गेल अछि।
ओ कहलनि जे एहि मुठभेड़मे दू टा सुरक्षाकर्मी शहीद भऽ गेल, एकटा राज्य पुलिसक डिस्ट्रिक्ट रिजर्व गार्ड आ दोसर स्पेशल टास्क फोर्सक छलाह आ दू गोटे घायल भऽ गेल अछि। ओ कहलनि जे दूनू घायल जवान, जकरा खतरासँ बाहर बतायल गेल अछि, हुनका इलाजक लेल हेलीकॉप्टरसँ एकटा नीक चिकित्सा सुविधामे लऽ जायल गेल अछि आ क्षेत्रमे एखनो तलाशी अभियान चलि रहल अछि।
एहि साल एखन धरि राज्यमे मारल गेल 81 नक्सलीमेसँ 65 गोटे बीजापुर सहित सात जिलाक बस्तर संभागमे मारल गेल अछि।
पुलिसक अनुसार, पछिला साल छत्तीसगढ़मे अलग-अलग मुठभेड़मे सुरक्षा बल 219 नक्सलीकेँ समाप्त कऽ देलक। जनतब देब जे पिछले साल गृहमंत्री अमित शाह कहने छलाह “देश मार्च 2026 तक नक्सलीसँ मुक्त भऽ जायत।”
