जम्मू-कश्मीरक ऊपरी इलाकामे लगातार खराब मौसमक कारण अमरनाथ यात्रा प्रभावित भेल अछि। एहि ठाम बरखा आ भूस्खलनक कारण हजारों यात्रीकें दिक्कतक सामना करय पड़लनि।
एहेन स्थितिमे भारतीय सेना एक बेर फेर अपन शिविरमे सैकड़ों श्रद्धालुकें आश्रय दऽ कऽ अमरनाथ तीर्थयात्रीक सुरक्षाक प्रति अटूट प्रतिबद्धताक प्रदर्शन कयलक अछि।
अमरनाथ यात्रा फिलहाल बंद भऽ गेल अछि। खराब मौसमक कारण ई फैसला लेल गेल अछि। पिछला किछु दिनसॅं लगातार बरखाक कारण अमरनाथ यात्राक मार्गमे बाधा आबि गेल अछि। भारी बरखाक कारण बहुत रास मलबा सड़क पर खसल अछि। यात्रासॅं लौटल बहुत रास भक्तकेँ रास्तामे बहुत दिक्कतक सामना करय पड़ल।
भारतीय सेनाक अनुसार 16 जुलाई केर साँझ करीब 7:15 बजे लगातार बारिशक कारण भूस्खलन भेल जाहिसँ यात्रा बाधित भऽ गेल छल आ भारी संख्यामे यात्री फँसल छलथि। स्थितिक गंभीरता देखि एतय तैनात सेनाक टुकड़ी तुरंत राहतक काज शुरू कय देलक। इलाकामे फंसल करीब 500 यात्रीकेँ टेंटमे ठहराओल गेल आ भोजनक व्यवस्था कयल गेल।
एकर अलावा लगभग ३,००० यात्री सेना केर लंगरमे शरण लेलक, जतय ओकरा आवश्यक आश्रय आ भोजन भेटल। कैम्प डायरेक्टर आ भारतीय सेनाक कंपनी कमांडर मौका पर मौजूद छलथि आ स्थितिक स्थिर आ नियंत्रणमे बतेने छलथि।
सभ यात्रीक सुरक्षा आ भलाई सुनिश्चित करय केर प्रयास जारी छल।
