पीएम आवास योजनाक तहत लाभार्थीकेँ तीन किस्तमे कुल 1.20 लाख रुपयाकेँ सहायता प्रदान कयल जाइत अछि, जाहिमे 60 प्रतिशत राशि केंद्र सरकार आ 40 प्रतिशत राज्य सरकार वहन करैत अछि।
मुख्यमंत्री नीतीश कुमार बुधदिन प्रधानमंत्री ग्रामीण आवास योजनाक तहत 3 लाख परिवारकेँ पहिल किस्तक रूप मे 1200 करोड़ रुपयाक एकमुश्त हस्तांतरण कयलथि।
कार्यक्रमक दौरान ग्रामीण विकास विभागक सचिव लोकेश कुमार सिंह जानकारी प्रदान करैत कहलनि जे प्रधानमंत्री ग्रामीण आवास योजनाक अन्तर्गत सितम्बर २०२४ मे २,४३,९०३ क पहिल लक्ष्य प्राप्त कयल गेल छल। भारत सरकारक ग्रामीण विकास मंत्रालयसँ २७ जनवरी, २०२५ सँ ५,४६,७४५ केर अतिरिक्त लक्ष्य प्राप्त भेल अछि।
लोकेश कुमार सिंह आगू कहलनि जे प्रधानमंत्री आवास योजना ग्रामीणक अन्तर्गत वित्तीय वर्ष २०२४-२५ लेल कुल ७,९०,६४८ लक्ष्य प्राप्त कयल गेल अछि। प्रधानमंत्री आवास योजना ग्रामीणक लाभार्थीसभकेँ आवास निर्माणक प्रगतिक आधार पर तीन किश्तमे कुल १.२० लाख टाकाक सहायता राशि प्रदान कयल जाइत अछि। एहि योजनामे ६० प्रतिशत राशि केन्द्र सरकार आ ४० प्रतिशत राज्य सरकार वहन करैत अछि। एहि तरहेँ लाभार्थीसभकेँ राज्यक हिस्साक रूपमे ४० प्रतिशत अर्थात ४८ हजार रूपैयाक राशि देल जाइत अछि।
एहिसँ पहिने 7 अक्टूबर, 2024 केँ मुख्यमंत्री नीतीश कुमार 1.05 लाख लाभार्थीकेँ पहिल किस्त सहायता राशिक एकमुश्त भुगतान कयलथि। एहि पर 420 करोड़ रुपया खर्च भेल। बुधदिन कार्यक्रममे 3 लाख लाभार्थीकेँ 40 हजार रुपयाक पहिल किस्त राशिक एकमुश्त भुगतान कयल गेल। एहि पर कुल 1200 करोड़ रुपया खर्च भेल।
शौचालय निर्माणक लेल १२,००० अनुदान देल जायत। ओ कहलनि जे आगामी १०० दिनमे एहि लाभार्थीसभकेँ दोसर आ तेसर किश्तमे ८०,००० रूपैयाक दरसँ भुगतान कयल जायत। एकर अतिरिक्त, एहि लाभार्थीसभकेँ मनरेगाक माध्यमसँ अकुशल मजदूरीक रूपमे २२,०५० रुपया आ लोहिया स्वच्छ बिहार मिशनक अन्तर्गत शौचालय निर्माणक लेल १२,००० रुपया भेटत। एहि तरहेँ प्रत्येक लाभार्थीकेँ १,५४,०५० (एक लाख चौवन हजार पचास) रुपया भेटत। एहि तरहें अगिला 100 दिनमे एहि कार्यक्रमसँ लाभान्वित 3 लाख लाभार्थीकेँ लगभग 4621.50 करोड़ रुपया भेटत।
कार्यक्रमक दौरान मुख्यमंत्री नीतीश कुमार कहलनि कि ओ एहिसँ लाभान्वित परिवारकेँ बधाई दैत छथि। ओ काल्हिक कार्यक्रमक आयोजन लेल ग्रामीण विकास विभागकेँ बधाई सेहो देलनि। ओ केन्द्र आ राज्य सरकारक योजनाकेँ ठीकसँ लागू करबाक आग्रह कयलनि जाहिसँ लाभार्थीसभकेँ तत्काल लाभ भेटय। ई सुनिश्चित करबाक लेल विशेष ध्यान देल जेबाक चाही जे लाभार्थीसभकेँ कोनो असुविधाक सामना नहि करय पड़य।
एहि अवसर पर उपमुख्यमंत्री सम्राट चौधरी आ विजय कुमार सिन्हा, ग्रामीण विकास मंत्री श्रवण कुमार, मुख्य सचिव अमृतलाल मीणा, मुख्यमंत्रीक प्रधान सचिव डॉ. एस. सिद्धार्थ, मुख्यमंत्रीक सचिव अनुपम कुमार, ग्रामीण विकास विभागक सचिव लोकेश कुमार सिंह, मुख्यमंत्री’क सचिव कुमार रवि, मुख्यमंत्री’क विशेष कार्य पदाधिकारी गोपाल सिंह, जीविका’क मुख्य कार्यपालक पदाधिकारी हिमांशु शर्मा, मनरेगा’क आयुक्त अभिलाषा शर्मा सहित अन्य वरीय अधिकारी उपस्थित छलथि, जखनि कि जिलाक जिलाधिकारी आ किछु लाभुक वीडियो कॉन्फ्रेंसिंगक माध्यम जुड़ल छलथि।
