बिहारक उप मुख्यमंत्री विजय कुमार सिन्हा मंगलदिन (28 जनवरी) एकटा प्रेस कॉन्फ्रेंस कयलनि जाहि दौरान ओ विभागमे अनियमितताक बारेमे पैघ खुलासा कयलथि। ओ सीधा विपक्षक नेता तेजस्वी यादव पर आरोप लगा चुकल छथि। विजय कुमार सिन्हा कहलनि जे तेजस्वी यादव (2016-17) केर कार्यकालमे गया केर तीन सड़कक निर्माणमे लगभग 26 करोड़ रुपयाक अवैध निकासी भेल छल।
विजय सिन्हा कहलनि जे रोड डिवीजन गया’क अन्तर्गत वजीरगंज-तपोवन सड़क (१९.१८ किमी), जमुआ-सेवतार सड़क (१७.५ किमी) आ भिंदुस-चामुंडी सड़क (२१.३ किमी) केर निर्माणमे अनियमितता भेल अछि। तीनू काज राजा कंस्ट्रक्शन द्वारा कयल गेल छल। आब एहि कंपनीक सभ काजक समीक्षा कएल जाएत।
विजय सिन्हा कहलनि जे एहि सड़कक निर्माणमे पाथर झारखण्डक पाकुड़सँ किनबाक छल, मुदा ई ओतयसँ नहि अपितु स्थानीय स्तर (मानपुरसँ) कीनल गेल छल। कुल मिला कए 26 करोड़ टाकासँ बेसीक भुगतान गलत ढंगसँ कयल गेल अछि।
ओ कहलनि जे तत्कालीन सड़क निर्माण मंत्री तेजस्वी यादवक कार्यकालमे गड़बड़ी भेल छल। ओहि समय सत्तामे रहनिहार लोक गड़बड़ कऽ देलनि आ दोषी पदाधिकारीक विरुद्ध कार्यवाही तक नहि कयलनि।
विजय सिन्हा आगू कहलनि जे राजा कन्स्ट्रक्शनकेँ संरक्षण देनिहार लोकक विरुद्ध सेहो कार्यवाही कयल जायत। ओ जहानाबादक सांसद सुरेन्द्र यादव पर राजा कन्स्ट्रक्शन कंपनीसँ सम्बन्ध रखबाक आरोप सेहो लगौलनि। विजय कुमार सिन्हा दोसर आरोप लगओलनि जे सुल्तानगंजमे कंवरिया पथ (लगभग 83 किमी) पर रेत बिछाबयमे गलती भेल अछि, एहि पर कारवाई सेहो कैल जायत। स्थानीय लोकक शिकायतक बाद जाँचमे मामिला सही पाओल गेल। वर्किंग संवेदककेँ सेहो ब्लैकलिस्ट कएल जाएत। विजय सिन्हा कहलनि जे पुलक संग-संग सड़कक लेल स्वास्थ्य कार्ड सेहो बनाओल जायत। सड़क निर्माण विभाग जाँच लेल आईआईटी आ एनआईटीक अभियन्ताक एकटा टीम बनओत।
