जेडीयू पटनामे पोस्टर लगा क’ बीजेपी आ महागठबंधन दुनूके उत्तर देलक अछि। एहि पोस्टरसँ बतेबाक प्रयास कएल गेल अछि जे नीतीश कुमार फेर सीएम हेताह। नीतीशक कुर्सी पर आँखि गरेनाइ बंद करू।
बिहारक सत्ता पार्टी आ विपक्षी पार्टी सभ अप्पन चुनावी तैयारीमे लागल अछि। 2025 विधानसभा चुनावसँ पहिने दुनू गठबंधनक भीतर सियासत जोर पर अछि। आगामी 2025 विधानसभा चुनावमे दुनू गठबंधनक भीतर बड़ा भाई आ छोटा भाईक भूमिकेँ ल’ क’ सियासी तकरार देखल जा रहल अछि। विपक्ष नीतीश कुमार पर निशाना साधैत देखाइत अछि, त’ एनडीए तेजस्वी यादव पर।
बिहारक नेता प्रतिपक्ष समेत तमाम विपक्षी दल सब कहैत अछि कि महाराष्ट्र विधानसभा चुनाव परिणामक बाद शिंदे संग जे भेल से नीतीश कुमार संग होएत। तेजस्वी यादव तँ बीजेपीकेँ चुनौती दय देने छथि। तेजस्वी कहलनि बीजेपी ऐलान करय जे चुनाव परिणामक बाद नीतीश कुमार सीएम होएत।
एहि बीच बुधदिन तमाम चर्चाक बीच जेडीयू पार्टी दफ्तरक बाहर ऑफिशयल पोस्टर लगाकऽ सभ प्रश्नक उत्तर देबाक कोशिश कयल जा रहल अछि। जेडीयू पार्टी दफ्तरक बाहर पोस्टर लगाकऽ बीजेपी आ महागठबंधन दुनूकेँ जवाब दय रहल अछि कि नीतीश कुमार सीएम होएत। नीतीशक कुर्सी पर नजरि देनाइ बंद करू। जेडीयू एक संग तीनटा नव ऑफिशयल पोस्टर लगौने अछि। मुख्य पोस्टर नीतीश कुमारक तस्वीरक संग “25 सँ 30 फेरसँ नीतीश”, तँ दू अन्य नीतीश कुमारक विकास पर लगाओल गेल अछि। जेडीयू द्वारा जारी कएल गेल ई पोस्टर स्पष्ट कय दैत अछि कि जेडीयू आश्वस्त अछि जे ओ एनडीएमे बड़का भाईक भूमिकामे अछि आ सिर्फ चुनाव नहि बल्कि चुनाव परिणामक बादो नीतीश सीएम होएत।
जनतब जे बिहारमे विस चुनावक चर्चा केर संग एनडीएक सीएम फेसकेँ ल’ क’ सेहो राजनीति काफी दिनसँ चलि रहल अछि। प्रश्न ई अछि जे चुनावक बाद नीतीश सीएम रहि जेताह वा नहि ? विपक्ष बेर-बेर ई कहि रहल अछि जे बीजेपी शिंदे जेकाँ हाल करत। संगहि बीजेपीक कतेको बयान सेहो एहि शंकाक पुष्टि करैत रहैत अछि, तथापि एनडीएमे साफ भ’ गेल अछि जे सीएम नीतीश कुमार रहताह, मुदा विपक्ष एकरा ल’ क’ जेडीयू पर लगातार निशाना साधि रहल अछि।
