बिहारक सहरसा निवासी आईपीएस अधिकारी हर्षवर्धनक सड़क दुर्घटनामे मृत्यु भऽ गेल अछि। हर्षवर्धन कर्नाटकक हासन जिलामे अपन पहिल पोस्टिंगमे शामिल होयबाक लेल जा रहल छलाह। एहि दौरान ई दुर्घटना भेल अछि। पुलिस कहलक जे हर्षवर्धन कर्नाटक कैडरक २०२३ बैचक आईपीएस अधिकारी छलाह।
आईपीएस हर्षवर्धनक परिवार मिथिला क्षेत्रीय बिहारक सहरसा जिलाक अछि। हुनक पिताक नोकरी मध्य प्रदेशमे छल, तेँ ओ ओतय चलि गेलाह। मात्र २६ वर्षक आयुमे हुनकर निधन भऽ गेलनि।
जानकारीक अनुसार ई दुर्घटना रविदिन (१ दिसंबर) साँझमे भेल। यात्राक दौरान हासन तालुकक किट्टाने लग पुलिस वाहनक टायर फटि गेल, जकर बाद वाहन चालकसँ बेकाबू भऽ सड़कक कातमे एकटा घर आ गाछसँ टकरा गेल। आईपीएस अधिकारी हर्षवर्धन होलेनरसीपुरमे परिवीक्षाधीन सहायक पुलिस अधीक्षकक रूपमे ड्यूटी पर रिपोर्ट करबाक लेल कर्नाटकक हासन जा रहल छलाह। एकटा वरिष्ठ पुलिस अधिकारी बतौलनि जे हर्षवर्धनकेँ माथमे गम्भीर चोट लागल छल। जकर बाद इलाजक क्रममे अस्पतालमे हुनकर मृत्यु भऽ गेलनि। चालक मंजेगौड़ाकेँ मामूली चोट लागल।
