देशभरिमे काल्हि ईद मनाओल गेल। पटनाक गांधी मैदानमे हर सालक जँका एहि वर्ष भोर 7.30 बजे ईदक नमाज अदा कएल गेल। एहि दौरान मुख्यमंत्री नीतीश कुमार सेहो गांधी मैदान पहुँचलाह। जेहिमे करीब 20 हजार लोकनि एक संगे नमाज अदा कयलनि।
रमजानक पाक महिनाक बाद काल्हि देशभरिमे ईद-उल-फितरक त्योहार मनाओल गेल। बिहारक मुख्यमंत्री नीतीश कुमार प्रदेशवासीकेँ ईदक बधाई देलनि। एहि खास अवसर पर ओ पटनाक गांधी मैदान पहुँचलाह, जतए ओ पारंपरिक टोपी पहिरि प्रदेशवासीक आ मुस्लिम समुदायकेँ ईदक मुबारकबाद देलनि।
एहीसँ पहिने सीएम नीतीश कुमार सोशल मीडिया प्लेटफॉर्म एक्स पर लिखलनि, “ईदक अवसर पर प्रदेश आ देशवासीसभकेँ आ विशेष कऽ मुस्लिम भाई-बहिनसभकेँ हार्दिक बधाई आ शुभकामना। खुदा एहि मुबारक दिन हमरा सभ पर अपन रहमतक वर्षा कए राज्यमे सुख, शांति आ समृद्धि प्रदान करथि।
बीतल संध्या अपन शुभकामना संदेशमे सीएम नीतीश कहलनि कि पवित्र रमजानक मासमे रोजेदारसभ द्वारा कएल गेल इबादतसँ परिवारक संग-संग प्रदेश आ देशमे शांति आ समृद्धि आबय। हमरा आशा अछि जे समाजमे अमन-चैन आ भाईचारा सदा कायम रहय। मुख्यमन्त्री कहलनि, “ईदक दिन ईनामक दिन अछि। खुदा एहि मुबारक अवसर पर अपन नेक बंदा सभकेँ ईनामसँ नवाजैत अछि। हमर दुआ अछि जे खुदा हम सभ पर अपन रहमतक वर्षा करय आ हमर जीवन सुख, शांति आ समृद्धिसँ भरल रहय।
एकरा संग-संग सीएम भारतक सांस्कृतिक एकता केर विशेषता दैत कहलनि, “भारत एकटा महान देश अछि, जाहिठाम विभिन्न धर्म आ सम्प्रदायक बीच प्रेम, सौहार्द्र आ सहिष्णुता अनुकरणीय अछि। एतय समस्त लोक एक-दोसरक पर्व सभमे भाग लैत छथि आ आपसी सम्मान संग खुशी बाँटैत छथि। ई हम्मर ताकत अछि, जे प्रदेश आ देशकेँ मजबूत बनबैत अछि।
जनतब जे भोरसँ ईदगाहमे चहल-पहल देखल गेल। लोक नव कपड़ामे सजल-धजल एक-दोसरसँ मिली ईदक मुबारकबाद दैत देखल गेलाह। एहि अवसर पर स्थानीय प्रशासन द्वारा सुरक्षाक पुख्ता व्यवस्था कएल गेल छल। समाजक प्रबुद्ध लोकनि एकता आ सौहार्द बना कय रखबाक संदेश सेहो देलनि।
