बीतल हफ्ता 752 नवका मामिला सामने आयल छल। एहि दौरान 305 लोक एहि संक्रमणसँ ठीक सेहो भेलथि। मुदा एहि वायरसक कारण बीतल हफ्ता 7 लोकक मृत्यु भेल।
एहि बीच खबरि भेटल अछि कि बिहारमे 2 लोक कोविड-19 केर चपेटमे आबि गेल छथि, एहिमेसँ एकटा पटना एम्सक डॉक्टर छथि। एकर जानकारी पटनाक डीएम चंद्रशेखर सिंह देलनि।
अधिकारी कहलनि कि पटना स्थित एम्सक एकटा डॉक्टर समेत 2 लोककेँ कोरोना वायरससँ संक्रमित होयबाक खबरि आयल अछि। जिलामे 31 वर्षक एकटा व्यक्तिक कोरोना संक्रमित होयबाक पुष्टि भेल अछि जे ताजा लहरिमे बिहारक पहिल मामिला अछि। सिविल सर्जन अविनाश कुमार सिंह कहलनि, ‘हालमे जिलामे एकटा व्यक्तिमे कोविड-19 संक्रमण पाओल गेल अछि, हालाँकि ओ बिहारसँ बाहर यात्रा नहिं कएलनि अछि। व्यक्तिमे संक्रमणक स्तर काफ़ी हल्का अछि। हुनकर इलाज एकटा प्राइवेट अस्पतालमे कएल जा रहल अछि। मामिलाक बारीकीसँ निगरानी कएल जा रहल अछि आ सब आवश्यक प्रोटोकॉलक पालन कएल जा रहल अछि।’
जिलाधिकारी चंद्रशेखर सिंह कहलनि कि एम्स पटनाक एकटा डॉक्टर सेहो कोरोना वायरसक चपेटमे आबि गेल छथि। घबराय केर आवश्यकता नहि अछि, मुदा एहतियातक मद्देनजर लोककेँ सतर्कता बरतए केर चाहि। स्थितिकेँ संभारए लेल स्वास्थ्य विभाग पूर्ण रूपेण तैयार अछि। जिलाधिकारी आगू कहलनि, ‘‘पटनाक सरकारी अस्पताल सभकेँ पहिनेसँ तैयारी सुनिश्चित करए केर लेल कहल गेल अछि। एहिमे बिस्तर, ऑक्सीजन, दवाइ आ टीकाक उपलब्धता सुनिश्चित करब शामिल अछि।’’
जनतब जे पिछला किछु हफ्तासँ देशभरिमे कोविड-19 केर मामिला बढ़ि रहल अछि, पिछला एक हफ्तामे 7 लोकक मृत्यु भऽ गेल अछि, मृतक महाराष्ट्र, केरल आ कर्नाटक केर छथि। राष्ट्रीय राजधानी दिल्लीमें कोविड-19 केर मामिलामे पैघ उछाल आयल अछि। राजधानीमे कोरोनाक 104 मामिला सक्रिय अछि। एहिमे सँ 99 मामिला पिछला एक सप्ताहक दौरान बढ़ल अछि। केंद्रीय स्वास्थ्य मंत्रालयक अनुसार, देशमे सबसँ बेसी सक्रिय मामिला केरलमे अछि। एकर बाद महाराष्ट्र आ दिल्लीक नंबर आबैत अछि। केरलमे कोविड-19 केर सक्रिय मामिलाक संख्या 430, महाराष्ट्रमे 209 आ दिल्लीमे 104 अछि। राष्ट्रीय राजधानी दिल्लीमे 19 मई धरि 24 सक्रिय केस छल। लेकिन, एक्के हफ्तामे 99 मामिला आओर बढ़ल, 24 टा मरीज एखन धरि रिकवर भ’ गेल अछि।
