मिथिला क्षेत्रीय बिहारक एहि सातटा जिलामे नव एयरपोर्टक विकासक हेतु 190 करोड़ मंजूर

पटना समदिया
*

नीतीश कुमार एहि वर्ष अपन ‘प्रगति यात्रा’क दौरान उड़ान योजना अन्तर्गत छोट एयरपोर्टक स्थापना लेल जरूरी कदम उठैबाक निर्देशन अधिकारीसभकेँ देने छलथि। आब जल्दिए एकर निर्माणक काज शुरू होएत।

बिहारमे उड़ान योजना अन्तर्गत कतेको नव हवाई अड्डाक विकासक लेल राज्य सरकारक अनुरोधकेँ केंद्रीय नागरिक उड्डयन मंत्रालय स्वीकृति देलनि अछि। मंत्रालयक प्रोजेक्ट इवेल्यूएशन कमेटी (पीईसी) राज्यमे छहटा छोट हवाई अड्डाक स्थापना वा विकासक पहिल चरणमे 25-25 करोड़ रुपयाक व्यय जारी करबाक सिफारिश कयलक।

एतबे नहि पूर्णिया एयरपोर्टक विकासक लेल सेहो 40 करोड़ रुपयाक व्यय जारी करबाक मंजूरी देल गेल अछि। एहेन स्थितिमे राज्यमे उड़ान योजना अन्तर्गत सातटा नव एयरपोर्टक स्थापना वा विकासक लेल कुल 190 करोड़ रुपयाक मंजूरी भेटि गेल अछि।

जनता दल यूनाइटेड (जदयू) केर कार्यकारी अध्यक्ष संजय कुमार झा कहलथि जे केंद्रीय नागरिक उड्डयन मंत्रालयक सचिवक अध्यक्षतामे हालमे भेल पीईसी केर बैठकमे बिहारक जे छह शहरमे एयरपोर्टक विकासक लेल 25-25 करोड़ रुपये जारी करबाक मंजूरी देल गेल अछि, ताहिमे मधुबनी, वीरपुर (सुपौल), सहरसा, मुंगेर, मुजफ्फरपुर आ वाल्मीकि नगर शामिल अछि। ओ कहलथि जे मुख्यमंत्री नीतीश कुमार एहि वर्ष जनवरी-फरवरीमे अपन ‘प्रगति यात्रा’क दौरान एहि शहरमे उड़ान योजना केर तहत छोट एयरपोर्टक स्थापनाक लेल आवश्यक कदम उठाएबाक निर्देश राज्य सरकारक अधिकारीसभकें देने छलथि।

सांसद झा सोशल मीडिया प्लेटफॉर्म एक्स पर लिखलथि, “एहिसँ पहिने मुख्यमंत्री राज्य सरकारक वरिष्ठ अधिकारी आ एयरपोर्ट अथॉरिटी ऑफ इंडिया (एएआई)क अधिकारीसभक संग बैठकमे कहलथि जे राज्यक कोनो भागसँ अधिकतम 200 किलोमीटर केर अंदर हवाई अड्डाक व्यवस्था होयबाक चाही, ताकि आम लोकक हवाई सफरमे सहुलियत होइ आ राज्यक किसान आ उद्यमीसभक उत्पाद देशक अन्य भाग आ विदेशसभमे सुगमता पूर्वक पहुँच सकए।”

पीईसीक बैठकमे एएआईक अधिकारी सभ सूचना देलथि जे उड़ान योजनाक तहत बिहारक पूर्णियामे एयरपोर्टक विकासक काज शुरू कएल गेल अछि आ टर्मिनल भवनक निर्माणक काज 20 फरवरी 2025 केँ आवंटित कएल गेल अछि। पूर्णिया एयरपोर्टक लेल 40 करोड़ रुपैया जारी करबाक सिफारिश कएल गेल अछि।

राज्य सरकार ‘उड़ान’ योजनाक तहत भागलपुरमे सेहो एयरपोर्टक विकासक अनुरोध कएने छल। एहि पर सेहो विस्तृत चर्चा भेल, मुदा तय कएल गेल जे भागलपुरमे एयरपोर्टक लेल प्रस्तावित स्थलक फिजिबिलिटी स्टडी रिपोर्ट आबि जाएबाक बाद पीईसीक अगिला बैठकमे एहि पर विचार कएल जायत। जानकारी देल गेल जे ‘उड़ान’-5.2 क तहत बिहारमे विभिन्न छोट एयरपोर्टसँ कैटेगरी-2बी (20 सीट सँ कम क्षमता वला छोटे विमान) केर उड़ानक संचालनक लेल एयरलाइंस निविदा जमा कएल गेल अछि।