भाजपाक रेखा गुप्ता दिल्लीक मुख्यमंत्रीक रूपमे काल्हि रामलीला मैदानमे उपराज्यपाल वीके सक्सेना द्वारा शपथ लेलनि। मुख्यमंत्री पदक शपथ’क अतिरिक्त प्रवेश वर्मा, मनजिंदर सिंह सिरसा, आशीष सूद, कपिल मिश्रा, पंकज कुमार सिंह आ रविंदर राज सेहो मंत्रीक रूपमे पदक शपथ लेलनि। एहि दौरान प्रधानमंत्री नरेन्द्र मोदीक संग एनडीए शासित राज्यक मुख्यमंत्री आ उपमुख्यमंत्री सेहो मंच पर उपस्थित छलाह।
शपथ ग्रहण समारोहक लेल तीनटा अलग-अलग चरण तैयार कयल गेल छल। मुख्य मंचमे प्रधानमंत्री नरेन्द्र मोदी, उपराज्यपाल वीके सक्सेना, नियुक्त मुख्यमंत्री आ मंत्रिपरिषदक सदस्यक संग एनडीए शासित राज्यक मुख्यमंत्री आ उपमुख्यमंत्री उपस्थित छलाह। दोसर चरणमे धार्मिक नेता आ विशिष्ट अतिथि उपस्थित छलाह, जखन कि तेसर चरणमे संगीत कार्यक्रमसँ जुड़ल कलाकार छलाह।
उल्लेखनीय अछि जे बुधदिन साँझ विधायक दलक बैसारमे रेखा गुप्ताकेँ मुख्यमंत्रीक रूपमे चुनल गेल छल। मुख्यमंत्री चुनल गेलाक बाद मीडियासँ अपन पहिल बातचीतमे ओ कहलनि, “पीएम मोदी दिल्लीक जनताक लेल जे दृष्टिकोण देलनि अछि ओकरा पूरा करब हमर प्राथमिकता होयत। हम प्रधानमंत्री मोदीक प्रति हार्दिक आभार व्यक्त करय चाहैत छी जे ई सम्मान मात्र हमर नहि अछि, बल्कि ई देशक प्रत्येक माता-पुत्रीक लेल सम्मान अछि।
प्रवेश वर्मा मुख्यमंत्री’क प्रबल दावेदार छलाह, मीडिया आ अन्य सभक आंकलन छल जे वर्मा उपमुख्यमन्त्रिक रूप में शपथ लेताह। मुदा आधिकारिक तौर पर एकर घोषणा नहीं भेल। जनतब देब जे रेखा गुप्ता शपथ लेलक बाद दोसर गोपनीयताक शपथ प्रवेश वर्मा लेलनि। वर्मा कहलनि जे पार्टीसँ जुड़ल छी आ हरदम रहब। जे काज भेटत तकर निर्वहन करबाक कोशिश करब। एखनि जनतासँ कयल गेल वादा पूरा करबाक समय अछि आ दिल्ली केर हाल बदलबाक अछि।
रेखा गुप्ता दिल्लीक शालीमार बाग सीटसँ पहिल बेर विधायक चुनल गेल छथि। ओ आम आदमी पार्टीक बन्दना कुमारीकेँ २९,५९५ मतक अन्तरसँ पराजित कयलनि। दिल्ली विधानसभा चुनावक परिणाम ८ फरवरीकेँ घोषित कयल गेल छल। भाजपा २६ सालक बाद ७० सीटमेसँ ४८ सीट जीतैत ऐतिहासिक जीत हासिल कयलक, जखन कि आम आदमी पार्टी घटि कऽ २२ सीट पर आबि गेल।
