सहरसा जंक्शन विश्वस्तरीय स्टेशनक रूपमे विकसित कयल जा रहल अछि। एकरा लेल ४४ करोड़ रुपयाक लागतसँ आधुनिक यात्री सुविधा वाला नव भवनक निर्माण सेहो पूरा होमय वाला अछि। एकर अतिरिक्त पीएम गति शक्ति योजनासँ सेहो अन्यान्य योजना लेल १५८ करोड़ रूपैया देल गेल अछि। उक्त बात सांसद दिनेश चंद्र यादव मंगल दिन अपन आवास पर आयोजित पत्रकार सम्मेलनमे बतौलनि।
सांसद कहलनि जे प्रधानमंत्री गति शक्ति योजनाक तहत सहरसा स्टेशनक बुनियादी सुविधा बढ़ेबा लेल १५८ करोड़ रूपैयाक लागतसँ विभिन्न परियोजनाक मंजूरी भेटि गेल अछि, जे एहि क्षेत्र लेल पैघ उपलब्धि अछि। एकर आधारशिला सेहो बिहारमे प्रधानमंत्रीक कार्यक्रमक दौरान संभव अछि। एहि ठामसँ लंबा दूरीक ट्रेनक प्रस्थानमे आब कोनो दिक्कत नहि होएत।
ओ कहला जे सब योजना पूरा भेलाक बाद यात्री सुविधामे काफी बढ़ोतरी होएत आ समस्याक समाधान सेहो होयत। एहि योजनाक तहत बंगाली बाजार ढालामे जामक काफी कम करबाक व्यवस्था कयल गेल अछि। ओ कहला जे बीस गोट कोच एमईएमयू आर डीईएमयू टर्मिनेशन ट्रेन लेल दू फुल लेंथ आइलैंड पीएफ आर दू डॉक प्लेटफॉर्म सह अतिरिक्त लाइन चालू कयलासँ वर्तमान आवश्यकता आर अनुमानित यातायात पूरा कयल जायत। एहिसँ कोचिंग रैकक अन्य स्टेशन पर शिफ्ट करबाक जरूरत नहि पड़त। संगहि प्लेटफार्म नंबर ३ आ ४ केर लंबाई बढ़ेबा लेल लाइट आरओबी केर प्रावधानक संग दूटा फुल लेंथ डायरेक्ट डिलीवरी गुड्स सेट लाइन बिछाओल जाएत। जकर कारण बंगाली बाजार बंद हेबाक कोनो समस्या नहि होएत। एआरटी, एआरएमई साइडिंग सीधा मेन लाइनसँ जुड़ल ड्यूल एंट्री आ एग्जिटक प्रावधान होएत। लम्बा बोगीक जगह छोट बोगी केर शंटिंगक प्रावधान होएत। एकर अलावा मशीन टावर वैगन आ इंजन स्टेबलिंग लाइन तैयार कयल जाएत।
ओ कहला जे सहरसा मानसी रेल लाइनक दुगुना करबा लेल डीपीआर तैयार कयल जा रहल अछि। एहि पर सेहो काज जल्दिये शुरू भऽ जाएत। एकर संगहि कहलनि कि सहरसा-लहेरियासराय नव रेल लाइन केर डीपीआर समीक्षाक दौरान लागत केर अधिकताक कारण डीपीआरमे फेरसँ संशोधन कयल जा रहल छै । एहिमे संलग्न आ तत्पर भऽ कऽ ओ एहि परियोजनाक मंजूरी लेबाक सेहो कोशिश करताह।
एहि अवसर पर भाजपा जिला अध्यक्ष दिवाकर सिंह, जदयू केर अमर कुमार यादव, विनय कुमार यादव, डॉ. लुत्फुल्लाह, शशि शेखर झा, शिव भूषण सिंह, सुमित सिन्हा, प्रो हरिनारायण यादव सहित अन्यान्य लोक उपस्थित रहलाह।
