प्रवर्तन निदेशालय (ईडी) बलरामपुर, मुंबई आ लखनऊमे अवैध धर्मांतरणक आरोपी जमालुद्दीन उर्फ छांगुर आ ओकर करीबी सहयोगी केर १५ स्थान पर मनी लांड्रिंग आ हवाला नेटवर्कसॅं जुड़ल मामिलामे पैघ कार्यवाही कयलक।
छांगुर बाबाक 12 स्थान पर ईडीक 15 टीम कार्यवाही कयलक। ई कार्यवाही एक संग काल्हि भोरे 6 बजे पूर्ण योजनाक तहत शुरू भेल छल, जाहिसॅं ककरो भागबाक मौका नहि भेटय। एहि कार्यवाहीमे ईडीकें बहुत रास चौंकाबय वला सुराग भेटल अछि।
बलरामपुरमे बाबाक नुकायल जगह पर करीब 13 घंटा धरि तलाशी लेल गेल। कहल जा रहल अछि जे एहि दौरान करोड़ों केर संपत्तिक जांच कयल गेल। जमीन खरीद-बिक्रीसॅं जुड़ल लोकक घर पर सेहो छापामारी कयल गेल, जाहि दौरान ईडी लेनदेनक विवरण एकत्रित कयलक।
ईडी शहजाद शेख उर्फ इलियास शेखक महिम आ बांद्रा परिसरमे सेहो छापा मारलक, जकर खातामे छांगुर एक करोड़ रुपया पठा देने छल। बलरामपुर कोर्ट कार्यालयक बाबू राजेश उपाध्यायक आवासक सेहो तलाशी लेल गेल।
छापामारी केर दौरान ईडी कतेको संपत्ति, सोना, नगदी आ लग्जरी कारक कागजात बरामद कयलक अछि। एकर साथ-साथ दुबई, यूएई आ नेपालसॅं भेटयवाला फंडिंग केर बारेमे सहो सुराग जुटायल गेल।
