अपराध

सत्यकाम फाउंडेशन ट्रस्ट पर १५ करोड़ गबनक आरोप

मधुबनी समदिया
*

मधुबनीक माल गोदाम रोड पर सत्यकाम फाउंडेशन ट्रस्टक कार्यालयमे काल्हि सोमदिन खुब हंगामा भेल जखन सैकड़ो पीड़ित जमा भेलाह आ हंगामा शुरू कऽ देलनि। सभ आरोप लगबैत छथि जे ट्रस्ट द्वारा ऋण आ अन्य वित्तीय सहायताक वादा कयल गेल छल, मुदा समय बीतलाक बादो नहि रूपया भेटल आ नहिं ट्रस्टक कर्मीसँ कोनो सम्पर्क भऽ रहल।

पीड़ितक कहब छनि जे सत्यकाम फाउंडेशन ट्रस्ट द्वारा हुनका सभसँ धोखा देल गेल अछि। ओ इहो आरोप लगओलनि जे ट्रस्टक कर्मचारी अचानक कार्यालयसँ फरार भऽ गेल छथि, जाहिसँ समस्या उत्पन्न भऽ गेल अछि। पीड़ित लोकनि कहलनि जे ओ एहि मामिलाक जानकारी जिला मजिस्ट्रेट (डीएम) आ अनुविभागीय अधिकारी (एसडीएम) केँ देलनि आ प्रशासनसँ तत्काल मदति करबाक अपील कयलनि।

एहि आरोपपर प्रतिक्रिया दैत सत्यकाम फाउंडेशन ट्रस्टक जीएम कहलनि जे ओ एहि मामिलाक जाँच कऽ रहल छथि आ दोषी पाओल जायवला लोकक विरुद्ध उचित कारवाई कयल जायत। यद्यपि ओ मामिलाक गम्भीरताकेँ स्वीकार कयलनि आ कहलनि जे जांच पूरा होयबा धरि कोनो बयान देबासँ परहेज करब उचित होयत।

एहि घटनाक्रमक बाद प्रशासन पर पीड़ितकेँ न्याय दियाबय लेल तत्काल कारवाई करबाक दबाव बढ़ि रहल अछि। पीड़ितक कहब छनि जे जँ हुनका जल्दिये राहत नहि भेटत तँ ओ आओर कठोर कदम उठाबय लेल तैयार छथि।

Spread the love