पूर्णिया पुलिसकेँ बड़का सफलता भेटल अछि। पुलिस बेलौरीमे एनएच-३१ पर वाहन जाँचक क्रममे एकटा स्विफ्ट कारसँ पाँच किलोसँ बेसी स्मैक बरामद कयलक अछि। अन्तर्राष्ट्रीय बजारमे स्मैकक मूल्य एक करोड़सँ बेसी होयबाक अनुमान अछि। ई जानकारी पूर्णियाक पुलिस अधीक्षक कार्तिकेय शर्मा बृहस्पतिदिन देलनि।
एसपी कहलनि जे मुफस्सिल थाना सशस्त्र बलक संग रात्रि गश्तक दौरान एसएचओ बलौरीमे एनएच-३१ केर ओवरबीज पर छलाह। ओही समय मरमाक तरफसँ एकटा स्विफ्ट कार आबि रहल छल, जे पुलिस बलकेँ देखलाक बाद पहिने धीमा भऽ गेल। तखनि ओ घुमि कs भागबाक प्रयास कयलक। जखनि पुलिस बल ओहि कार लग जाय लागल तखनि एकटा व्यक्ति ओहि कारसँ निकलि भागबाक प्रयास कयलक, ताबत धरि पुलिस बल पकड़ि लेलक।
जखन पकड़ल गेल व्यक्तिसँ पुलिस कार चालकक नाम पता पुछलक तखन ओ अपन नाम महावीर प्रसादक पुत्र रौनक कुमार आ चालकक नाम रिक्की सिंह पुत्र स्व.शिवशंकर सिंह पूर्णिया जिलाक कहलक। जखनि पुलिस कारकेँ विधिवत तलाशी लेलक तखनि ओकर कारक डिक्कीसँ प्लास्टिकमे बान्हल पाँच किलोसँ बेसी स्मैक भेटल। जकर बाद पुलिस कार जब्त कऽ लेलक आ कारसँ स्मैक सहित अन्य सामान बरामद कयलक। एकरा संग पुलिस दुनू आरोपीकेँ गिरफ्तार कय लेलक।
