मुम्बई पुलिस न्यू इंडिया कोऑपरेटिव बैंकमे १२२ करोड़ टाकाक घोटालाक मामिलामे व्यवसायी जावेद आजमकेँ गिरफ्तार कयलक अछि। एकटा अधिकारी कहलनि जे मुम्बई पुलिसक आर्थिक अपराध शाखा (ईओडब्ल्यू) जावेद आजम (४८) केँ गिरफ्तार कयलक, ई एहि मामिलामे एखन धरिक आठम गिरफ्तारी अछि।
इलेक्ट्रॉनिक सामानक व्यापारी जावेद आजम भाजपा नेता हैदर आजमक छोट भाय अछि आ एहि मामिलामे गिरफ्तार कयल गेल आठम आरोपी अछि। ईओडब्ल्यूक अनुसार, मेहता कथित रूपसँ २०१९ सँ २०२५ धरि बैंकक सेफसँ पाइ चोरी कऽ रहल छल आ एकरा अपन दूटा निकट सहयोगी धर्मेश पौन आ उन्नाथन अरुणाचलमकेँ सौंपि देलक जे धनक दुरूपयोग करबामे सहायता कयलक।
जाञ्चक क्रममे ईओडब्ल्यूकेँ पता चलल जे आजमकेँ गिरफ्तार अभियुक्तमेसँ एक उन्नाथन अरुणाचलमक माध्यमसँ १८ करोड़ रूपया भेटल छल। महाराष्ट्र केर कांदिवलीक निवासी आजम बिहारमे इलेक्ट्रॉनिक्स वस्तुक वितरणक व्यवसाय करैत अछि।
अधिकारी कहलनि जे उन्नाथन अरुणाचलम, जे इलेक्ट्रॉनिक्स वस्तुक व्यापारमे सेहो छल, आजमक सम्पर्कमे आबि गेल। ओ कहलनि जे जाञ्चमे पता चलल अछि जे उन्नाथन आ हुनक पिता मनोहर अरुणाचलम बैंकसँ ३३ करोड़ टाकाक हेराफेरी कयलक। जे बैंकक पूर्व महाप्रबंधक आ लेखा प्रमुख हितेश मेहता, जे एहि मामिलाक मुख्य आरोपी अछि, २०१९ मे मनोहर अरुणाचलमकेँ १५ करोड़ रुपया देने छल, ओकर बाद अपन कार्यालयमे १८ करोड़ रूपया आजमकेँ सौंपि देलक।
पुलिसक अनुसार, मुम्बईमे न्यू इंडिया कोऑपरेटिव बैंकक प्रभादेवी (दादर) आ गोरेगाँव कार्यालयक सेफसँ १२२ करोड़ रूपया निकालल गेल। किछु आओर व्यक्तिक नाम सेहो वांछित अभियुक्तक रूपमे देल गेल अछि, जाहिमे बैंकक पूर्व अध्यक्ष हिरेन भानु आ हुनक पत्नी, पूर्व उपाध्यक्ष गौरी भानु शामिल अछि, जे घोटाला सोझाँ अयबासँ ठीक पहिने विदेश भागि गेल।
पछिला सप्ताह मुम्बई पुलिस मुख्य आरोपी हितेश मेहताक पॉलीग्राफ परीक्षण कयलक। ई परीक्षण, जकरा लाइ डिटेक्टर टेस्ट सेहो कहल जाइत अछि, मेहता पर शहरक कलिना क्षेत्रक फोरेंसिक विज्ञान प्रयोगशालामे कयल गेल छल। ईओडब्ल्यू सूत्रक अनुसार, परीक्षणक परिणाम मेहताक प्रतिक्रियामे सम्भावित धोखाधड़ीक संकेत दैत अछि।
१२२ करोड़ टाकाक न्यू इंडिया कोऑपरेटिव बैंक घोटालाक जाँच करैवला मुंबई पुलिस आर्थिक अपराध शाखा (ईओडब्ल्यू) मुख्य आरोपी हितेश मेहताकेँ ब्रेन मैपिंग टेस्टक करत, किएक तँ ओ बैंकक पूर्व महाप्रबंधकक पॉलीग्राफ परीक्षणसँ बेसी जानकारी नहि जुटा सकल।
११ मार्चकेँ कलिना फोरेंसिक प्रयोगशालाक विशेषज्ञ द्वारा मेहता पर पॉलीग्राफ परीक्षण, जकरा लाइ डिटेक्टर टेस्टक नामसँ सेहो जानल जाइत अछि, कयल गेल छल, किएक तँ ओ कथित रूपसँ पूछताछक क्रममे रूपयाक लेनदेनक संबंधमे अपन बयान बदलैत रहल आ जाञ्चमे सहयोग नहि कयलक।
परीक्षणक परिणामसँ पता चलल छल जे ओ पूरा वैज्ञानिक परीक्षणमे भ्रामक छलाह आ जाँचकेँ एकटा नव दिशा देबाक लेल हुनकासँ बेसी जानकारी नहि निकालल जा सकैत छल। ईओडब्ल्यू अधिकारी कहलनि, “तेँ बेसी महत्वपूर्ण जानकारी निकालबाक आशाक संग हुनका ब्रेन मैपिंग टेस्टक करबाक निर्णय लेल गेल अछि।”
एम्हर ईओडब्ल्यू जांचमे पता चलल अछि जे गबन कयल गेल धनक किछु हिस्सा बिहारमे एकटा इलेक्ट्रॉनिक व्यवसायमे निवेश कयल गेल छल। ईओडब्ल्यूक एकटा अधिकारी कहलनि जे एहि मामिलामे हालहिमे गिरफ्तार कयल गेल ४८ वर्षीय जावेद आजमक जाञ्चसँ ई पता चलल अछि जे आजमकेँ एकटा आओर प्रमुख आरोपी उन्नाथन अरुणाचलमसँ कथित रूपसँ प्राप्त १८ करोड़ टाकामेसँ १५ करोड़ टाका ओ बिहारमे ‘डिजिटल दुनिया’ नामसँ इलेक्ट्रॉनिक वस्तुक ११ स्टोरक श्रृंखला स्थापित करबामे निवेश कयने छल। एकटा आओर अधिकारी कहलनि जे ईओडब्ल्यू एहि स्टोरकेँ जब्त कऽ सकैत अछि। जनतब देब जे जावेद आजम मूल रूपसँ मधुबनी जिला अन्तगर्त पंडौल प्रखंडक उदयपुर बिठुआर पंचायत केर गढ़िया गामक रहनिहार अछि आ ‘डिजिटल दुनिया’ नामसँ पहिल इलेक्ट्रॉनिक वस्तुक स्टोर वाट्सन स्कूल लग खोललक आ मात्र ४ सालमे बिहारक अन्य स्थान पर ‘डिजिटल दुनिया’ नामसँ कुल ११ इलेक्ट्रॉनिक वस्तुक स्टोर स्थापित कयलक।
पुलिस कहलक जे १२ फरवरीकेँ बैंकक प्रभादेवी आ गोरेगांव शाखामे आरबीआईक निरीक्षणक दौरान धोखाधड़ीक पता चललाक बाद मेहता अपराध स्वीकार कयलनि आ अन्य आरोपी व्यक्तिक भूमिकाक खुलासा कयलक। भानु दम्पतिक विरुद्ध जल्दिये ब्लू कॉर्नर नोटिस जारी कयल जा सकैत अछि किएक तँ ईओडब्ल्यू सम्बन्धित केन्द्रीय एजेन्सीसँ अनुरोध कयलक अछि।
शहरक एकटा अदालत एहि दम्पतिक विरुद्ध गैर जमानती वारंट सेहो जारी कयलक अछि। ओना, ओ सभ मुम्बई ईओडब्ल्यू प्रमुखकेँ पत्र लिखि वीडियो कॉन्फ्रेंसिंगक माध्यमसँ जाञ्चमे शामिल होयबाक मांग कयलनि आ इहो दावा कयलनि जे १२२ करोड़ टाकाक गबनमे ओ कतहु शामिल नहि छथि।
